ბავშვთა დაცვის საერთაშორისო დღისადმი მიძღვნილი ღონისძიებები ნაძალადევის რაიონში კონცერტით დასრულდა. ღონისძიებაში მონაწილეობა 14 საბავშვო ბაღის აღსაზრდელებმა მიიღეს.
პატარების სადღესასწაულო განწყობაზე მულტფილმის გმირებმა, ჯამბაზებმა და სახის მომხატველებმა იზრუნეს. ასევე, ბავშვებისთვის მოეწყო სხვადასხვა სპორტული და სახალისო აქტივობა.
ღონისძიებას ნაძალადევის რაიონის გამგებელი ირაკლი ხელაძე თბილისის საკრებულოს მაჟორიტარ დეპუტატებთან, თამარ ტალიაშვილთან და ალექსანდრე ხუჯაძესთან ერთად დაესწრო.
„ყველა პატარას ვულოცავ ბავშვთა დაცვის საერთაშორისო დღეს და მათ წარმატებულ მომავალს ვუსურვებ. ზღვის უბნის ერთ-ერთ სკვერში დღეს სადღესასწაულო განწყობა იყო. ნაძალადევის რაიონში რეგისტრირებული ბაღების აღსაზრდელებმა მრავალფეროვანი საკონცერტო ნომრები წარმოგვიდგინეს. გამგეობა, საბავშვო ბაღებთან ერთად ყოველთვის ცდილობს ეს დღე გაულამაზოს სტუმრად მოსულ პატარებს“, – განაცხადა ირაკლი ხელაძემ.
ბავშვთა უფლებების დაცვის დღისადმი მიძღვნილი გასართობი ღონისძიება ნაძალადევის რაიონის გამგეობის ორგანიზებით გაიმართა.