ზაზა სვანაძე გირაოთი გაათავისუფლეს

თბილისის საქალაქო სასამართლოს მოსამართლემ ადვოკატის შუამდგომლობა დააკმაყოფილა და ჟურნალისტ ზაზა სვანაძეს  5 000-ლარიანი გირაო შეეფარდა.
როგორც „კვირას“ თბილისის საქალაქო სასამართლოში განუცხადეს, ბრალდებული სასამართლო სხდომის დარბაზიდან გათავისუფლდა.
გირაოს გადახდის ვადად განესაზღვრა 7 დღე. მომდევნო სხდომა, ანუ საქმის არსებითად განხილვა დაიწყება 14 ივნისს, 15 საათზე.
შეგახსენებთ, რომ ზაზა სვანაძეს ორთვიანი წინასწარი პატიმრობა ჰქონდა მისჯილი.
საქმის მასალების თანახმად, სვანაძეს მუქარაში ნავთობისა და გაზის კორპორაციის საზოგადოებასთან ურთიერთობის ხელმძღვანელი, ნინო ჯღარკავა ადანაშაულებდა.
ნინო ჯღარკავას ინფორმაციით, ზაზა სვანაძე მის შვილს, სოციალური ქსელის მეშვეობით, სიცოცხლის მოსპობით ემუქრებოდა. გარდა ამისა, სვანაძეს პროკურატურა ერთ-ერთი ჟურნალისტის შეურაცხყოფასა და მუქარას ედავება.ზაზა სვანაძის მიმართ გამოძიება სსკ-ის 151-ე მუხლით მიმდინარეობს, რაც მუქარას გულისხმობს.