ჩემი შვილიშვილი დამნაშავე არ არის, მას ღმერთი იცავს – ამის შესახებ ხორავას ქუჩაზე დავით სარალიძის ჯგუფურად ჩადენილ გაზრახ მკვლელობაში ბრალდებულ მიხეილ კალანდიას ბაბუამ ბორის კაკუბავამ განაცხადა.
მისივე თქმით, მიხეილ კალანდიას დაკავება როგორც ხელისუფლების, ასევე ოპოზიციის ინტერესშია.
„ჩემი შვილიშვილი ამ დანაშაულში არ მონაწილეობდა. ყველაფერი გაირკვევა. ალბათ, ყველას ინტერესშია რომ დააკავეს – ხელისუფლების, ოპოზიციის. მიზანი კი ამ ქვეყნის დამხობა და ამოტრიალებაა. ჩემი შვილიშვილი არაა დამნაშავე და მას ღმერთი იცავს, – განაცხადა ბორის კაკუბავამ.
ხორავას ქუჩაზე მომხდარი მკვლელობის საქმეზე ბრალდებულ მიხეილ კალანდიას სასამართლო პროცესი დაიხურა.
საქალაქო სასამართლოში ხორავას ქუჩაზე არასრულწლოვან დავით სარალიძის მკვლელობის საქმეზე მიხეილ კალანდიას აღკვეთის ღონისძიების შეფარდების საქმეზე მსჯელობენ.
სხდომის დახურვის შუამდგომლობით სასამართლოს პროკურატურამ მიმართა. მიზეზად კი ის დაასახელეს, რომ საქმე არასრულწლოვნებს ეხებათ.
პროკურატურის შუამდგომლობას დაეთანხმა დაცვის მხარეც.
პროკურატურა მისთვის აღკვეთის ღონისძიების სახით პატიმრობის შეფარდებას ითხოვს.
ადვოკატი კი მიხეილ კალანდიას გირაოთი გათავისუფლებას მოითხოვს.