„შინაგან საქმეთა სამინისტრომ გიორგი გახარიას ხელმძღვანელობით, ქვეყანა რეალურად გადაარჩინა სახელმწიფო გადატრიალებას,“- ამის შესახებ აგრარულ საკითხთა კომიტეტის თავმჯდომარემ ოთარ დანელიამ პარლამენტში, პლენარულ სხდომაზე განაცხადა.
მისი თქმით, პოლიციელები თავიანთი სიცოცხლის ფასად იცავდნენ ინსტიტუციას და სახელმწიფოებრიობას. 240 ადამიანი რომელიც იმ საღამოს დაზარალდა და დასახიჩრდა მათ შორის არის 100 პოლიციელი. აქედან 30 პოლიციელი, რომელიც გაიტაცეს ყველა მათგანი უკლებლივ არის ნაცემი.
„ტრაგედიაა რაც მოხდა იმ დღეს, არ შეიძლება ვინმეს სხვა აზრი ქონდეს. ძალიან მშვიდობიანი პროტესტი გადაიზარდა დაძაბულობასა და დაპირისპირებაში და ისიც წაქეზებით. არ შეიძლება, ჩვენ ერთი ხელის მოსმით დავაყენოთ გიორგი გახარიას გადადგომის საკითხი. ოპოზიციის საქმე არ არის, არც მისი გათავისუფლება და არც მისი დანიშვნა. ამას წყვეტს გუნდი ეს არის გუნდური პასუხისმგებლობის საკითხი. ჩვენ ყველა ვიღებთ ამაზე პასუხისმგებლობას. გადადგა პარლამენტის თავმჯდომარე და პოლიტიკური ფასი არის ძალიან დიდი,“- განაცხადა ოთარ დანელიამ.
დანელიას თქმით, არც ერთ პოლიტიკურ გუნდს ამის ნახევარი ფასი არ გაუღია.
„პოლიტიკური ისტებლიშმენტი თავის დროზე შეთანხმდა, არავითარი ძალადობა, არსებობს სამართლიან პირობებში ჩატარებული არჩევნები, რაც არის ერთადერთი სწორი იარაღი ხელისუფლების გადაბარების. ჩვენ წავედით ამ პოლიტიკურ გადაწყვეტილებაზე. 2020 წელს „ქართულმა ოცნებამ“ მიიღო გადაწყვეტილება, რომ იქნება ნულოვანი ბარიერი და პირდაპირპროპორციული არჩევნები, რომელშიც ქართველი ხალხი მიიღებს გადაწყვეტილებას. გახარიასთვის ერთ გროშად არ ღირს ის თანამდებობა რაც უჭირავს ვინმეს ეჭვი ეპარება ამაში?!“- განაცხადა ოთარ დანელიამ.