ვიცე-პრემიერი მაია ცქიტიშვილი „ანაკლიის განვითარების კონსორციუმის“ მიერ საინვესტიციო ხელშეკრულებით ნაკისრ ვალდებულებებზე საუბრისას აღნიშნავს, რომ კონსორციუმს ჯერ კიდევ 2017 წლის აგვისტოში უნდა უზრუნველეყო ბანკებთან ან ნებისმიერ სხვა დამფინანსებელთან შეთანხმებების დადება იმისთვის, რომ დაედასტურებინა პორტის მშენებლობისთვის საჭირო თანხის არსებობა. 2017 წლის აგვისტო იყო ამ ვალდებულების შესრულების თავდაპირველი ვადა, რომლის გადავადება მოხდა ნოებრამდე, შემდეგ კი – 2018 წლის დეკემბრამდე. ამის მერე კონსორციუმმა ისევ შეატყობინა მთავრობას, რომ ვერ ახერხებდა დაფინანსების ვადაში მოზიდვას, თუმცა ამ შემთხვევაში საჭირო გახდა არა მხოლოდ გადავადება, არამედ ბანკების მიერ წარმოდგენილი 8 ახალი პირობის განხილვა. ამ პირობებიდან ერთ-ერთი იყო ტვირთების გარანტიის პირობა.
„ვალდებულების შესრულების ვადა პირველად დადგა 2017 წლის აგვისტოში და 2018 წლის ბოლომდე ისე მივედით, რომ პრაქტიკულად წელიწადნახევრით იყო გადავადებული ამ ვალდებულების შესრულება. შემდეგ, დაწყებული 2018 წლის დეკემბრიდან, გვქონდა მიცემული ვადა 2019 წლის 1 ივლისამდე, რომელიც ეხლა უკვე გადავწიეთ 2019 წლის ბოლომდე. რაც შეეხება სხვა ვალდებულებებს, კონსორციუმს ასევე ქონდა ვალდებულება დაესრულებინა პორტის დეტალური საპროექტო დოკუმენტაციის მომზადება, შეერჩია კონტრაქტორი და რაც ასევე მნიშვნელოვანია, თავდაპირველად ჯერ 2017 წლის ბოლოს და მერე 2018 წლის ბოლოს დაეწყო პორტის მშენებლობა,“- აღნიშნა მაია ცქიტიშვილმა.
ვიცე-პრემიერის თქმით, პროკურატურის ინტერესი, პირველად 2019 წლის იანვარში, პროკურატურის მიერ ჩატარებულ ბრიფინგზე ანუ ბანკების მიერ ახალი პირობების დაყენების შემდეგ დაფიქსირდა. შესაბამისად, პროკურატურის თემას არ შეუფერხებია პორტის დაფინანსების პროცესი.