რკინიგზელები, ხელფასების გაზრდის მოთხოვნით, მასშტაბურ აქციებსა და გაფიცვებს გეგმავენ. პროფკავშირები გაფიცვის დაწყების ზუსტ თარიღს 10 აგვისტოს დააანონსებენ. ცნობილია, რომ ამ დროისთვის საგაფიცვო პროცედურების დაწყების მოთხოვნაზე ხელს 4 800 ადამიანი აწერს.
რკინიგზელთა ახალი პროფკავშირის თავმჯდომარის მოადგილე ილია ლეჟავა აცხადებს, რომ რკინიგზელთა მოთხოვნა ხელფასის 50 პროცენტით მომატებაა. მისივე თქმით, რკინიგზის ადმინისტრაცია მოლაპარაკებებსა და მედიაციაზე უარს აცხადებს.
„მათი სახელფასო ანაზღაურება ძალიან დაბალია, აქედან გამომდინარე, რკინიგზელთა ახალმა პროფკავშირმა რკინიგზის ადმინისტრაციასთან კოლექტიური შრომითი დავა დაიწყო, რომ მათი ხელფასები გაიზარდოს. პროფკავშირს ყველა მონაცემი დამუშავებული აქვს, მათ შორის ბიუჯეტთან დაკავშირებული და რკინიგზის ადმინისტრაციასთან კონკრეტული შეთავაზება აქვს, ეს ხელფასები როგორ, რა ფორმით და რა პერიოდულობით უნდა გაიზარდოს. რკინიგზის ადმინისტრაცია მოლაპარაკებებზე უარს ამბობს.
პროცედურა შრომის კოდექსით გაწერილია. 21 დღე რადგან ამოიწურა, რკინიგზელებს კანონით აქვთ მოპოვებული გაფიცვის უფლება. ამისთვის პროფკავშირები 10 აგვისტოს შეიკრიბებიან და გაფიცვის დღეს დააანონსებენ. ჩვენი მოთხოვნაა, ანაზღაურება 50%-ით გაიზარდოს, თუმცა, პროფკავშირი მზად იყო, თუ მოლაპარაკება შედგებოდა, გადავადებასთან დაკავშირებით, კონკრეტული შეთავაზება გაეკეთებინა. სამწუხაროდ, ეს მოლაპარაკება არ შედგა. აქედან გამომდინარე, გაფიცვის უფლება მოპოვებულია და ერთადერთი გზა გვაქვს, რომ კონსტიტუციით მინიჭებული ეს უფლება გამოვიყენოთ“, – განაცხადა ლეჟავამ.