შეხვედრა წარიმართა კონსტრუქციულ გარემოში და ეს არის წინგადადგმული ნაბიჯი, – ამის შესახებ საქართველოს უსაფრთხოების საბჭოს აპარატის უფროსმა, კახა ქემოკლიძემ სოფელ ჩორჩანასთან გამართული შეხვედრის შემდეგ განაცხადა.
როგორც ქემოკლიძემ აღნიშნა, შეხვედრის მონაწილე ყველა მხარე შეთანხმდა, რომ ვითარების დეესკალაციისკენ უნდა გადაიდგას ნაბიჯები.
მისივე თქმით, საგუშაგოს ლოკაციაზე არის ის აზრთა სხვადასხვაობა, რომელიც გააჩნია დე ფაქტო ხელისუფლებისა და ცენტრალური ხელისუფლების წარმომადგენლებს.
ამასთან, რაც შეეხება ულტიმატუმის ენას, ქემოკლიძემ აღნიშნა, რომ მისმა კოლეგებმა დააფიქსირეს, რომ ულტიმატუმის ენა მათი განზრახვა არ ყოფილა.
რაც შეეხება საგუშაგოს ლოკაციას, ქემოკლიძემ განაცხადა, რომ ბლოკპოსტის დაშლის საკითხი დღევანდელ შეხვედრაზე არ განხილულა.
ქართულ მხარესთან ერთად, დღევანდელ შეხვედრაში მონაწილეობდნენ ეუთო-სა და ევროკავშირის სადამკვირვებლო მისიის, აგრეთვე, ცხინვალისა და რუსეთის საოკუპაციო რეჟიმის წარმომადგენლები.