ფრაქცია “ქართული ოცნების” თავმჯდომარის მამუკა მდინარაძის განცხადებით, უმრავლესობის უმრავლესობა პროპორციულ სისტემას უჭერს მხარს. მისი თქმით, სწორი იყო პარტიის თავმჯდომარის და უმრავლესობის გადაწყვეტილებაც იმაზე, რომ ქვეყანა პროპორციულ სისტემაზე უნდა გადავიდეს, “აქედან გამომდინარე ჩვენ მივიღეთ გადავწყვიტეთ, რომ ეს არ შეიცვალოს”, – განაცხადა მამუკა მდინარაძემ პარტიის ცენტრალურ ოფისში უმრავლესობის შეხვედრის შემდეგ.
მამუკა მდინარაძის თქმით, არავინ არაფრის დაძალებას არ აპირებს დეპუტატებისთვის, შესაბამისად შიოლაშვილისა და ხუნდაძის მიერ სადეპუტატო მანდატის დატოვების საკითხი მდინარაძის თქმით, დღის წესრიგიდან მოხსნილია.
“არ არის ლოგიკა იმაში, რომ ჩავარდეს [პროპორციულ სისტემაზე კანონპროექტი] იქედან გამომდინარე, რომ უმრავლესობის დიდი ნაწილი, უფრო მეტიც – უმრავლესობა, პროპორციულ სისტემას უჭერს მხარს. რა თქმა უნდა, ჩვენ დამოუკიდებლად ამ გადაწყვეტილების მიღება არ შეგვიძლია იმიტომ, რომ ამას 113 დეპუტატის მხარდაჭერა სჭირდება, ესე იგი ოპოზიციის ხმებიც უნდა დაემატოს და საერთო ჯამში საქართველოს პარლამენტმა უნდა მიიღოს გადაწყვეტილება პროპორციულ სისტემაზე გადასვლასთან დაკავშირებით”, – განაცხადა მამუკა მდინარაძემ.