გულდაწყვეტილი ვარ იმ შედეგებით, რაც საბოლოო ჯამში მივიღეთ, რაც მიმაჩნია, რომ ჩვენი საერთო პასუხისმგებლობაა – ეს განცხადება პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ გააკეთა.
აკაკი ზოიძემ “ქართული ოცნების” ოფისში გამართული შეხვედრის დასრულების შემდეგ თქვა, რომ გარკვეული დრო სჭირდება მომავალზე დასაფიქრებლად, თუმცა იმ გადაწყვეტილებას არ მიიღებს, რომლითაც იმ ფასეულობები დააზიანებს, რაც “ქართულ ოცნებას” გააჩნდა.
“ერთ რამეს გეტყვით, გვქონდა უმრავლესობის შეხვედრა, ვისაუბრეთ, მოვისმინე ჩემი კოლეგების პოზიციები მიღებულ გადაწყვეტილებასთან დაკავშირებით. მადლობა გადავუხადე იმ კოლეგებს, რომლებმაც მხარი დაუჭირეს იმ დაპირებას, რომელიც ჩვენ ყველამ ერთად მივეცით… ძალიან განხიბლული ვარ საბოლოოდ, გულდაწყვეტილი ვარ იმ შედეგებით, რაც საბოლოო ჯამში მივიღეთ, რაც მიმაჩნია, რომ ჩვენი საერთო პასუხისმგებლობაა, მიუხედავად იმისა, რომ კოლეგებმა მივეცით ჩვენ ხმა იმ დაპირების შესრულებას, რაც ჩვენ გავეცით. მე მჭირდება გარკვეული დრო გადასაფასებლად, დასაფიქრებლად ქვეყნის მომავალთან, ჩვენი გუნდის მომავალთან დაკავშირებით, ამ სიტუაციის გააზრება, გარკვეული პაუზა მჭირდება ამისათვის. არც ერთ შემთხვევაში, მე არ მივიღებ გადაწყვეტილებას, რომელიც დააზიანებს ქართული ოცნების იმ ფასეულობებს და ღირებულებებს, რითაც ჩვენ მოვედით. მე უნდა ავიღო პაუზა და უნდა დავფიქრდე. რა დასკვნაც გამოვიტანე ჩემს თავში არის ის, რომ პრაგმატული პოლიტიკა გონებით მესმის, მაგრამ როგორც ჩანს, გულით არა“ – ამბობს ზოიძე.