აშშ-ის სახელმწიფო მდივანმა მაიკ პომპეომ უკრაინაში გამგზავრება გადადო. სახელმწიფო დეპარტამენტის განცხადებით, მიზეზი ერაყში ამერიკის საელჩოზე თავდასხმაა. იტყობინება France24.
პომპეო კვირის ბოლოს უკრაინაში, ბელარუსში, ნურსულთანში, უზბეკეთსა და კვიპროზე ვიზიტს გეგმავდა.
სახელმწიფო დეპარტამენტის პრესსპიკერის მორგან ორტაგუსის ცნობით, პომპეოს ვიზიტი უახლოეს მომავალში შედგება.
31 დეკემბერს ბაღდადში აშშ-ის მიერ ერაყში საბრძოლო დაჯგუფება „ქატაიბ ჰეზბოლას“ ობიექტებზე მიტანილი იერიშის გამო დაწყებული საპროტესტო აქციის მონაწილეებმა აშშ-ის საელჩოზე თავდასხმა განახორციელეს.
მანამდე აშშ-ის ქმედებები ერაყის საგარეო საქმეთა სამინისტრომ დაგმო, ირანმა კი, რომელიც „ქატაიბ ჰეზბოლას“ უჭერს მხარს, თავდასხმას „ტერორიზმის ნათელი მაგალითი“ უწოდა. აშშ-ის საჰაერო ძალებმა სირიასა და ერაყში დაჯგუფება „ქატაიბ ჰეზბოლას“ობიექტებზე იერიში 29 დეკემბერს მიიტანეს.
„ქატაიბ ჰეზბოლა“ შიიტი მუსლიმების საბრძოლო დაჯგუფებაა, რომელსაც ირანი უჭერს მხარს. ის 2007 წელს დაარსდა.