ვლადიმერ ბედუკაძის თქმით, “ნაციონალური მოძრაობის” 9-წლიან მმართველობაზე რეჟისორ გოგა ხაინდრავას ფილმის – “9+1”-ის სცენარი, რომელიც ციხის კადრებს ეხება, მისი დაწერილია. ამის შესახებ ბედუკაძემ ტელეკომპანია “იბერიის” ეთერში განაცხადა.
“როდესაც შარშან შემოთავაზება წამოვიდა ბატონი გოგასგან, მე არანაირი მორალური უფლება არ მქონდა, მისთვის უარი მეთქვა და არ დავხმარებოდი შეძლებისდაგვარად, რომ ის ფაქტები, რაც საზოგადოებამ იხილა გახმაურებული ციხის კადრებით, მხატვრული სახით კვლავ ენახა საზოგადოებას, მაქსიმალურად მიახლოებულიყო რეალობას. ფილმი მაქსიმალურად მიახლოებულია რეალობას. დეტალები არ ვიცი. გარკვეული პერიოდი ვიყავი ჩართული ამ ფილმში კონსულტანტად, გარკვეული პერიოდის მერე არ ვმონაწილეობდი. პირველი სცენარი, რაც ეხება ციხის კადრებს, ჩემს მიერ არის დაწერილი, ასევე, ყოფილი მსჯავრდებულების მიერ. შემდეგ როგორ განვითარდა და საბოლოო სახე რა მიიღო, ჩემთვის უცნობია, რადგან არ მომეცა საშუალება გადაღებას დავსწრებოდი”, – განაცხადა ლადო ბედუკაძემ.