უცნობი კორონავირუსის ეპიდემიის გამო ჩრდილოეთ კორეამ უცხოელი ტურისტებისთვის საზღვარი ჩაკეტა. ინფორმაციას ამის შესახებ სააგენტო Reuters-ი ავრცელებს.
„ოფიციალური ფხენიანი დროებით უკრძალავს უცხოელ ტურისტებს ჩრდილოეთ კორეაში შესვლას, ვიდრე ხელისუფლება არ ჩათვლის, რომ კორონავირუსთან დაკავშირებული სიტუაცია კონტროლს ექვემდებარება“, – აცხადებს ჩინური ტუროპერატორის, Young Pioneer Tours-ის წარმომადგენელი როვან ბერდი.
ჩინური მედიის ცნობით, ყოველწლიურად ჩრდილოეთ კორეას 350 ათასი ჩინელი სტუმრობს.
ოფიციალური ინფორმაციით, ჯამში უცნობი ვირუსით დაინფიცირებულთა მაჩვენებელი ამ დროისთვის 200-ს აჭარბებს, თუმცა ლონდონის იმპერიული კოლეჯის მეცნიერები ამბობენ, რომ დაავადებულთა რეალური რიცხვი 1700-ს აღწევს. 21 იანვარს ჩინეთმა დაადასტურა, რომ ახალი კორონავირუსი გადამდებია.
ემუქრება თუ არა მსოფლიოს ახალი ეპიდემია, ვრცლად შეგიძლიათ წაიკითხოთ ბმულზე.