თურქეთში, ელაზიღის პროვინციაში მომხდარი მიწისძვრის შედეგად გარდაცვლილთა რაოდენობამ 31-ს მიაღწია. ინფორმაციას ამის შესახებ საგანგებო სიტუაციების სამსახურზე დაყრდნობით სააგენტო Anadolu ავრცელებს.
ნანგრევებიდან მაშველებმა 45 ადამიანი ამოიყვანეს, მიწისძვრის შედეგების ლიკვიდაციის სამუშაოებში 3400-ზე მეტი მაშველი, ასობით ერთეული ტექნიკა და 17 ძაღლი მონაწილეობს.
საგანგებო სიტუაციების სამსახურის ინფორმაციით, მიწისძვრამ სრულად გაანადგურა 76 შენობა. 42 სახლი სერიოზულად დაზიანდა, 425-ს კი მცირე ზიანი მიადგა.
თურქეთის აღმოსავლეთში, ელაზიღის პროვინციაში 6,8 მაგნიტუდის სიმძლავრის მიწისძვრა 24 იანვარს მოხდა. მიწისძვრის ეპიცენტრი 6,5 კილომეტრის სიღრმეზე ქალაქ სივრიჯესთან დაფიქსირდა.
კომენტარები