ჯანდაცვის მინისტრი – მზად ვართ, ვმართოთ ყველა პროცესი

„ჯანდაცვის სამინისტრო არის მუდმივ კოორდინაციაში ყველა უწყებასთან და მზად ვართ, ვმართოთ ყველა პროცესი, გავუწიოთ რეკომენდაციები და დავეხმაროთ პროცესის მართვაში”, – ამის შესახებ საქართველოს ჯანდაცვის მინისტრმა, ეკატერინე ტიკარაძემ საქართველოს პრემიერ-მინისტრის ხელმძღვანელობით დღეს გამართული კორონავირუსთან დაკავშირებით შექმნილი უწყებათაშორისი საკოორდინაციო საბჭოს მორიგი სხდომის შემდეგ განაცხადა. როგორც მან აღნიშნა, ამ დროისთვის კარანტინის რეჟიმში 170-მდე მგზავრი იმყოფება.
“ამ ეტაპისთვის 170-მდე მგზავრი იმყოფება კარანტინის რეჟიმში. მინდა, მათ მადლობა გადავუხადო მაღალი სოციალური პასუხისმგებლობისთვის და იმ მზაობისთვის და რეკომენდაციების გათვალისწინებისთვის, რომელსაც მსოფლიო ჯანდაცვის ორგანიზაცია და ჩვენ ვუწევთ მათ.
​ასევე, მინდა მადლობა გადავუხადო მგზავრებს, რომლებიც სამომავლოდ იდენტიფიცირებული იქნებიან და გამოხატავენ მაღალ სოციალურ პასუხისმგებლობას და ნებას, რომ მოახდინონ საკუთარი თავის თვითიზოლაცია და ასევე მოთავსდნენ კარანტინში“, – განაცხადა ეკატერინე ტიკარაძემ.