მედიაჰოლდინგ “კვირას” დამფუძნებელი და რედაქტორი ქეთი ხოსიტაშვილი, სოციალურ ქსელში პოსტს აქვეყნებს და დავით ქაცარავას პასუხობს.
ქეთი ხოსიტაშვილის პოსტს უცვლელად გთავაზობთ.
“ყველა სიტყვაზე, რაც ამ სტატიაში წერია, პასუხს ვაგებ!
დავით ქაცარავა არის მატყუარა და არასოდეს მივცემ უფლებას, “კვირას” პრორუსული კლიშე მიაკეროს! ამას არ გავაბედინებ არასდროს!
ჩემი და ჩემი თანაგუნდელები მუდმივად ვართ ჩართულები რუსულ პროპაგანდასთან ბრძოლაში და ამ საკითხზე მკვეთრად გამოკვეთილი, ეროვნული პოზიცია გვაქვს!
ქაცარავამ, ალბათ, სიტყვა “ტიტუშკებიც” უკრაინიდან ისწავლა – მე ასეთ ქართულ სიტყვას არ ვიცნობ და არც იმ ადამიანს მინდა ვიცნობდე, ვინც ერთი ხელით რუსულ ოკუპაციას ებრძვის და მეორე ხელით ოკუპანტების “ალფა ბანკიდან” ფულს იღებს! ასე არ იქცევიან პატრიოტები და ვფიქრობ, თავისი ტყუილებით გამყოფ ზოლთან ხელოვნურად ძაბავს სიტუაციას! ოდნავაც არ ფიქრობს, იმ ადამიანების უსაფრთხოებაზე, რომლებიც ისედაც მტრის პირისპირ, რთულ პირობებში ცხოვრობენ და ჩემი აზრით, ზუსტად ისინი არიან გმირებიც და პატრიოტებიც!
სინამდვილეში რას ფიქრობს ეს ხალხი ქაცარავაზე, ზუსტად ვიცი და რაკი თავად ვერ გაუგია, დღეიდან მე და “კვირა დავეხმარებით… პირადად მას ვპირდები, კარდაკარ, გამყოფი ზოლის ყველა მოსახლესთან მივალთ, ჩავწერთ და აქ, ასე საჯაროდ მოისმენს უამრავი ადამიანის ხმას, პოზიციას, რომ არ შეიძლება ქვეყნისთვის ასეთი მტკივნეული თემით სპეკულირება და ეს რბილად რომ ვთქვათ, ქვეყნის ღალატია!
ამ სტატიაში მოყვანილი
გუნდიშვილის მაგალითი ერთ-ერთია იმ მრავალი ფაქტიდან, სადაც ქაცარავას ტყუილები ნათლად ჩანს! მისი ეს პროვოკაციული ქცევები კი, პირდაპირ, ზუსტადაც რომ რუსეთის წისქვილზე ასხამს წყალს!”
შეგახსენებთ, რამდენიმე დღის წინ, საოკუპაციო ხაზთან მცხოვრები, ელდარ გუნდიშვილმა, რომელიც ოკუპანტებმა უკანონოდ დააკავეს და შემდეგ გაათავისუფლეს, www.kvira.ge-თან საუბარში, დავით ქაცარავა ტყუილში ამხილა.
ანტისაოკუპაციო მოძრაობა “ძალა ერთობაშიას” ლიდერმა, დავით ქაცარავამ სოციალურ ქსელში გამოაქვეყნა პოსტი, სადაც წერდა, რომ ელდარ გუნდიშვილს ოკუპანტები ფიზიკურად გაუსწორდნენ. თავად გუნდიშვილმა ფაქტი უარყო და განაცხადა, რომ აღნიშნული ინფორმაცია სიმართლეს არ შეესაბამება. ელდარ გუნდიშვილმა ასევე, აღნიშნა, რომ დავით ქაცარავასთან მას კომუნიკაცია არ ჰქონია.
ამ ფაქტმა ქაცარავა და მისი მეუღლე, სოფიო ხაჭაპურიძე გააღიზიანა, ქაცარავამ სააგენტოს ჟურნალისტთან საუბრისას, მედიაჰოლდინგს ზონდერჰოლდინგი უწოდა, რომელიც მცდარი ინფორმაციის გავრცელებაში დაადანაშაულა.