ცოტა ხნის წინ, მსოფლიო ჯანდაცვის ორგანიზაციამ კორონავირუსის პანდემია გამოაცხადა. ამის შესახებ, WHO-ს საგანგებო ბრიფინგზე გახდა ცნობილი.
პანდემია არის ეპიდემიის ფართო მასშტაბით გავრცელება, რომლის მიხედვითაც რაიმე სახის ვირუსი მსოფლიოს არაერთ ქვეყანაში ერთდროულადაა გავრცელებული.
განმარტებას პანდემიასთან დაკავშირებით თბილისის ინფექციური საავადმყოფოს ხელმძღვანელმა, თენგიზ ცერცვაძემაც გააკეთა.
„პანდემია ჰქვია იმ მდგომარეობას, როცა ამა თუ იმ ინფექციის გავრცელება ცდება ორ კონტინენტს. როცა ვრცელდება ორზე მეტ კონტინენტზე, ეს სიტუაცია უკვე არსებობს დე ფაქტო, – განაცხადა ცერცვაძემ.
მისი თქმით, ჯანდაცვის მსოფლიო ორგანიზაციამ ახლა ჩათვალა საჭიროდ, რომ გამოეცხადებინა პანდემია.
„ძალიან დიდ მნიშვნელობას ნუ მივანიჭებთ ამ განცხადებას, რადგან პანდემია დე ფაქტო იყო უკვე კარგა ხანია, და ყველამ ეს ვიცოდით. უბრალოდ ეს არ ჰქონდა გამოცხადებული ჯანდაცვის მსოფლიო ორგანიზაციას. პანდემია ჰქვია იმ მდგომარეობას, როცა ამა თუ იმ ინფექციის გავრცელება ცდება ორ კონტინენტს. როცა ვრცელდება ორზე მეტ კონტინენტზე, ეს სიტუაცია უკვე დე ფაქტო არსებობს. თუ გაინტერესებთ, რატომ არ აცხადებდა ჯანდაცვის მსოფლიო ორგანიზაცია აქამდე, მას აქვს თავისი მოსაზრებები ამ საკითხზე, თუ როდის უნდა გამოაცხადოს. ის აცხადებს, როცა არა მარტო ორ კონტინენტს გაცდება, არამედ როცა მოსახლეობის დიდ მასას მოიცავს. ახლა ჩათვალა, რომ საკმარისად დიდი მასა მოიცვა მან, ხედავთ რომ ყოველდღე სწრაფად იზრდება შემთხვევები, განსაკუთრებით ევროპაში და გამოაცხადა პანდემია. ოფიციალურად, ეს ჩვენთვის არაფერს შეცვლის, ჩვენ მაინც ვმუშაობდით იმ რეჟიმში, რომ პანდემია იყო დე ფაქტო“, – განაცხადა თენგიზ ცერცვაძემ.
ამ დროის მონაცემებით, მთელი მსოფლიოს მასშტაბით კორონავირუსით 122 509 ადამიანი დაინფიცირდა, მათგან 4 397 შემთხვევა ფატალურად დასრულდა, 66 888 პაციენტი კი გამოჯანმრთელდა.