საქართველოს ყოფილმა პრეზიდენტმა, მიხეილ სააკაშვილმა რუსი კოლეგისთვის, ვლადიმერ პუტინისთვის მიცემული პირობა არ შეასრულა. ის აცხადებდა, რომ სამხრეთ ოსეთის და აფხაზეთის საკითხს ძალისმიერი მეთოდებით არ გადაჭრიდა მაგრამ მისი ქმედება საპირისპირო აღმოჩნდა, – ამის შესახებ რუსეთის პრეზიდენტმა, ვლადიმერ პუტინმა „ТАСС“ ინტერვიუში, „20 კითხვა ვლადიმერ პუტინს“ განაცხადა.
„ჩვენ ხომ არაერთხელ გვისაუბრია ამასთან დაკავშირებით, ჯერ კიდევ მაშინ როცა პრეზიდენტი იყო. ვეუბნებოდი, მხოლოდ მომისმინე, არავითარ შემთხვევაში არ სცადო სამხრეთ ოსეთის და აფხაზეთის საკითხს ძალისმიერი მეთოდებით გადაჭრა. არაო, არაო, ამას არასოდეს გავაკეთებო. და მიაწვა. მიაწვა – მიიღო!“- განაცხადა პუტინმა.
რუსეთის პრეზიდენტის თქმით, ამის შემდეგ რუსეთი “გვერდით გადახტა”, სააკაშვილი კი “მოედნებსა და სახურავებზე მარტის კატასავით დარბის”.
პუტინის თქმით, ამისთვის “ქართველები მიხეილ ნიკოლოზის ძეს უნდა უმადლოდენ“.