შინაგან საქმეთა მინისტრის მოადგილე ნინო ცაციაშვილმა ტელეკომპანია “მაესტროს” პირდაპირ ეთერში საუბრისას კორონავირუსის გავრცელების პრევენციის მიზნით განხორციელებული ღონისძიებების პროცესში სამინისტროს თანამშრომელთა ჯანმრთელობის დაცვის პრინციპულ მნიშვნელობაზე გაამახვილა ყურადღება.
შინაგან საქმეთა მინისტრის მოადგილის თქმით, უწყება პერმანენტულად ატარებს სადეზინფექციო სამუშაოებს, რათა მაქსიმალურად შემცირდეს ვირუსის შესაძლო გავრცელების რისკი.
„ უპირველეს ყოვლისა, მინდა აღვნიშნო, ისევე, როგორც ყველა უწყებისთვის და, ზოგადად, ხელისუფლებისთვის, ნებისმიერი შტოსთვის, ჩვენთვისაც ამოსავალი წერტილია ჩვენი თანამშრომლების ჯანმრთელობის მაქსიმალურად დაცვა. ამ მხრივ, პერმანენტულად ვახდენთ სადეზინფექციო საშუალებებით შენობების დამუშავებას. გარდა ამისა, ჩვენი თანამშრომლები აღჭურვილი არიან სპეციალური ფორმებით, რაც გულისხმობს ხელთათმანებს, პირბადეებს, სათვალეებს, რათა მაქსიმალურად შევამციროთ შესაძლო გავრცელება და გადადება იმ დაავადების, რომელიც პოტენციურად შეიძლება ჰქონდეს პირს, რომელიც არღვევს, პირობითად, თვითიზოლაციის წესებს“, – აღნიშნა ნინო ცაციაშვილმა.