„დღეს ბევრი ფორმატია ქვეყანაში, რომელიც მიზნად ისახავს შექმნილი ცუდი მდგომარეობიდან გამოსავლების მოძებნას მათ შორის, ეკონომიკასთან დაკავშირებით. ეს მუდმივი ფორმატი იქნება, რომელიც ოთხი ძირითადი მიმართულებით საზოგადოებაში არსებულ შეკითხვებს გასცემს პასუხებს სხვადასხვა ეტაპზე და სხვადასხვა დროს“, – აღნიშნულის შესახებ დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ რომან კაკულიამ განაცხადა.
მისი თქმით, პირველი მიმართულება ეხება იმას, თუ რა არის ის ძირითადი თანხა, რომლითაც ხელისუფლება შეძლებს გამოწვევების გამკლავებას.
„როგორი იქნება თითოეული სოციალური ჯგუფისათვის, რომელიც ჩვენს წინაშე არის ამ ეტაპზე სხვადასხვა ტიპის პრობლემებით წარმოდგენილი, მთავრობის პოლიტიკა – რა ტიპის დახმარებებზე შეიძლება ვიფიქროთ, როგორი იქნება მთლიანობაში ვაჭრობასთან დაკავშირებული სისტემა, რომელიც საქართველოში ამ ეტაპზე მოახერხებს იმას, რომ მაქსიმალურად ნაკლები დანახარჯებით, ნაკლები დაზარალებით გავიაროთ ეს პერიოდი და ბიზნესის ინდუსტრიების როგორი სპექტრი შენარჩუნდება სამომავლოდ ამაზე ცოტა მოგვიანებით ჩამოვყალიბდებით. როგორი იქნება ბიზნესის პრიორიტეტების რუკა, რა ტიპის ცვლილებები შეიძლება ამან განიცადოს და ამ ყველაფერს ჩვენ ერთობლივად უნდა გავცეთ პასუხი“, – აღნიშნა რომან კაკულიამ.
მისი თქმით, ქვეყანას ჯერ-ჯერობით აქვს ფინანსური და ეკონომიკური კრიზისი.
„ყველასთვის გასაგებია, რომ აქ მონეტარული პოლიტიკის შესაძლებლობები ოდნავ შეზღუდულია და მთელი წნეხი ფისკალურზე გადადის, მაგრამ როდესაც ფისკალურზე ვსაუბრობთ ორად არის ეს გასაყოფი, უნდა დავზოგოთ გარკვეული თანხები იმისათვის, რომ მაქსიმალურად ეფექტურად გამოვიყენოთ ისინი, ამიტომ გარკვეული კონკრეტული ბიზნესების არდასახელება მომავალი დახმარებისათვის, ეს სტრატეგიის არქონას კი არ ნიშნავს, ეს არის ჩვენი სტრატეგია სწორედ, რომ დავასახელოთ მაშინ, როდესაც ამის დრო იქნება და მაქსიმალური ეფექტიანობით გამოვიყენოთ ის თანხა, რომლის მობილიზებაც გასაკეთებელი იქნება სწორედ ამ სექტორების დახმარებისათვის“, – აღნიშნა დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ.
მისი თქმით, სწორედ ამას ემსახურება ეს ფორმატი, რომლის ფარგლებში აქტიურად გაგრძელდება მუშობა და ყოველთვის იქნება ის კონკრეტული დრო, როდესაც მიზანშეწონილი იქნება ამა თუ იმ ციფრის დასახელება, რომელიც შემდგომში სავარაუდოდ აღარ უნდა შეიცვალოს.
რომან კაკულიას თქმით, ეკონომიკური კრიზისის, მისი შემდგომი მდგომარეობიდან გამოსვლისათვის არსებულ სპეციალური საბჭოს მუშაობაში ერთი მხრივ, ის საპარლამენტო კომიტეტების თავმჯდომარეები მონაწილეობენ, რომლებიც დაკავშირებული არიან ეკონომიკასთან, ასევე, შესაბამისი მინისტრები, პრემიერის და პარლამენტის თავმჯდომარის ჩარულობით.