საქართველოს პრეზიდენტის, სალომე ზურაბიშვილის განცხადებით, მას გიგი უგულავასა და ირაკლი ოქრუაშვილის შეწყალებასთან დაკავშირებით, „ქართული ოცნების“ თავმჯდომარე, ბიძინა ივანიშვილისთვის კითხვით არ მიუმართავს და მას მხოლოდ გადაწყვეტილება შეატყობინა.
„მე კითხვის ფორმით კი არ მივმართე, მე მინდოდა ეს გადაწყვეტილება ცნობილი ყოფილიყო, იმიტომ რომ ეს არის ნორმალური ქვეყნის მართვის ფორმა, არ შეიძლება, რომ უცებ სიურპრიზები შეაგდო, ყველა უნდა იყოს გაფრთხილებული“, – განაცხადა ზურაბიშვილმა.
როგორც ის განმარტავს, ბიძინა ივანიშვილმა მას უთხრა, რომ ეს „მისი გადაწყვეტილება იყო“.
„თქვენი გადაწყვეტილება არისო, როგორც სხვათა შორის, მითხრა პირველივე დღიდან როცა არჩეული ვიყავი. იცოდეთ, კი დაგეხმარეთ, „ოცნების“ დახმარებით ამირჩიეს, მაგრამ თქვენი პრეზიდენტობა დამოუკიდებელი და ნეიტრალურია, როგორც კონსტიტუცია მოითხოვს, იცოდეთ, რომ თქვენ იქნებით დამოუკიდებელი თქვენს გადაწყვეტილებაშიო“, – განაცხადა ზურაბიშვილმა.
კითხვაზე, ბიძინა ივანიშვილიც მიიჩნევდა თუ არა, რომ გამოსავალი პოლიტიკოსების გათავისუფლება იყო, ზურაბიშვილმა უპასუხა, რომ ეს არ იცის.
„არ ვიცი, კიდევ ერთხელ ვიტყვი, არ ყოფილა არც ერთი ერთობლივი მსჯელობა. რატომ მივიღე ეს გადაწყვეტილება, მე მგონი ჩემი სიტყვით, ვეცადე ყოველ შემთხვევაში, რომ ყველაფერი მეთქვა ამის შესახებ, რომ ეს არ არის ემოციური გადაწყვეტილება, ეს არ არის სამართლებრივი გადაწყვეტილება, ეს არის სახელმწიფოებრივი გადაწყვეტილება. დღეს ჩვენ ვართ ძალიან არაორდინალურ სიტუაციაში“, – განაცხადა სალომე ზურაბიშვილმა „რუსთავი2“-ის გადაცემაში „ღამის კურიერი“.