რომის პაპმა ფრანცისკემ იტალიელებს მოუწოდა, რომ კორონავირუსთან მიმართებაში სიფრთხილე შეინარჩუნონ მიუხედავად იმისა, რომ, როგორც ჩანს, ყველაზე ცუდი უკან დარჩა.
წმინდა პეტრეს მოედანზე შეკრებილ მრევლს პაპმა ტრადიციული მიმართვისას მოუწოდა, რომ პირბადეების ტარებისა და სოციალური დისტანციის ზომების შესახებ მთავრობის რეგულაციებს დაემორჩილონ.
„ამ მოედანზე მცირე ოდენობით თქვენი ყოფნა მოწმობს, რომ იტალიამ პანდემიის ყველაზე მწვავე ფაზა გადალახა, მაგრამ ფრთხილად იყავით. ნუ იზეიმებთ გამარჯვებას ნაადრევად. ჩვენ ჯერ კიდევ უნდა დავიცვათ არსებული წესები, რადგან ისინი ვირუსის გამწვავების შესაძლებლობას თავიდან გვარიდებს“, – განაცხადა რომის პაპმა.
ფრანცისკეს თქმით, სამწუხაროდ, სხვა ქვეყნებში ვირუსს ჯერ კიდევ ბევრი მსხვერპლი ჰყავს.
„გასულ პარასკევს ერთ-ერთ ქვეყანაში ყოველ წუთში ერთი ადამიანი კვდებოდა. ეს საშინელებაა. ვილოცოთ მათთვის“, – აღნიშნა პაპმა.