დღეს მუხრანბატონის სასახლის ეზოში გამართულ ღონისძიებაზე ცნობილი გახდა ლიტერატურული პრემია “საბას” 2016 წლის გამარჯვებულები. ნომინაციაში „წლის საუკეთესო რომანი“ გაიცა ორი სრული პრემია – ბექა ქურხული (“სამოთხიდან გაქცეულები”) ; ზურაბ სამადაშვილი (“მოსალოდნელი მოულოდნელობანი”).
პრემია „საბა“ ლიტერატურის განვითარებაში შეტანილი განსაკუთრებული წვლილისათვის ტარიელ ჭანტურიას გადაეცა;
- წლის საუკეთესო პოეტური კრებული – “ყვავი ხის წვერზე ისაღამოებს”, ბესიკ ხარანაული;
- წლის საუკეთესო პროზაული კრებული – “იუნკერ ერისთავის ბუცები”; ზაალ სამადაშვილი;
- წლის საუკეთესო პიესა – არ გაცემულა (უკვე მესამედ);
- წლის საუკეთესო ლიტერატურული დებიუტი (ჟიურის რჩეული, გაიყო ორ ავტორზე) – “მსხლების მინდორი”, ნანა ექვთიმიშვილი; “დიაგნოზი”, იუნონა გურული;
- წლის საუკეთესო ლიტერატურული დებიუტი (მკითხველის რჩეული) – პოეტური კრებული “ჩვენ”, სალომე მაკარიძე;
- წლის საუკეთესო ლიტერატურული კრიტიკა – “20 ქართული მოთხრობა”, თამაზ ვასაძე;
- წლის საუკეთესო ესსეისტიკა და დოკუმენტური პროზა – “ირაკლი ფარჯიანი და შეხვედრის მეტაფიზიკა”, ზაზა ფირალიშვილი;
- უცხოური ნაწარმოების საუკეთესო ქართული თარგმანი – “ფრანგი ლეიტენანტის საყვარელი”, თამარ ჯაფარიძე;
- ქართული ნაწარმოების საუკეთესო უცხოური თარგმანი – “ვეფხისტყაოსანი”, ლინ კოფინი;
- საუკეთესო ელექტრონული წიგნი – “ლაზარე”, ოთარ ჯირკვალიშვილი
ყოველწლიურ ლიტერატურულ პრემია „საბაზე“, რომელიც დაფუძნდა 2003 წელს და დამფუძნებლები არიან „თი-ბი-სი ბანკი“ და პენცენტრი, განიხილება გასულ წელს წიგნად გამოცემული ყველა ორიგინალური ლიტერატურული ნაწარმოები (რომანი, პროზაული კრებული, პოეტური კრებული, პიესა), უცხოური ნაწარმოების ქართული თარგმანი, ასევე ლიტერატურული კრიტიკისა და დოკუმენტური პროზის ნიმუშები.
გამარჯვებულ ავტორებს, სპეციალურ პრიზთან ერთად, გადაეცემათ ფულადი პრემიები. საპრემიო ფონდი 52 ათას ლარს შეადგენს, რომელსაც გამარჯვებულ ავტორებს „თი-ბი-სი ბანკი“ გადასცემს.
ლიტერატურული პრემია „საბა“ უკვე 14 წელია არსებობს და დღემდე 115 პრემია გასცა.