ლაგოდეხში, 5 წლის ბავშვის მიმართ სექსუალური ხასიათის ქმედების ჩადენის ფაქტზე მსჯავრდებული 58 წლის კაცი დააკავეს. რამდენიმე საათიანი ძებნის შემდეგ სამართალდამცველებმა მას ტყეში მიაკვლიეს, სადაც ის სააპელაციო სასამართლოს მიერ გამამტყუნებელი განაჩენის გამოცხადების შემდეგ იმალებოდა.
პოლიციამ ლაგოდეხის ერთ-ერთ სოფელში მცხოვრები 58 წლის კაცის ძებნა მას შემდეგ დაიწყო, რაც სააპელაციო სასამართლოს გადაწყვეტილებით, 5 წლის ბავშვის გაუპატიურების მცდელობაში ბრალდებულს 13 წლით თავისუფლების აღკვეთა მიესაჯა.
გადაწყვეტილების დროს ბრალდებული სახლში იმყოფებოდა, თუმცა დასაკავებლად მისულ სამართალდამცველებს ის უკვე გაქცეული დახვდათ.
საქმე ეხება გასული წლის ზაფხულში მომხდარ შემთხვევას. 5 წლის გოგონას ოჯახის მტკიცებით, ბავშვის ბაბუის ძმამ, 60 წლამდე კაცმა, ბავშვი მოტყუებით საცხოვრებელი სახლის მეორე სართულზე აიყვანა, სადაც გაუპატიურება სცადა.
გურჯაანის რაიონული სასამართლოს მოსამართლე, დავით ნარიმანიშვილმა მიმდინარე წლის მაისში, 58 წლის კაცის მიმართ გამამართლებელი განაჩენი გამოიტანა, რაზეც 5 წლის გოგოს ოჯახმა პროტესტი არაერთხელ გამოხატა და სააპელაციო სასამართლოს მიმართა. მამაკაცს 13-წლიანი პატიმრობა გუშინ სწორედ სააპელაციო სასამართლომ შეუფარდა.