საქართველოსა და აზერბაიჯანს შორის შეთანხმება არ არის მიღწეული, რადგან სამწუხაროდ, შეუთავსებელი პოზიციებია და საქართველოს ინტერესია, ჩვენი პოზიცია დავიცვათ, – ამის შესახებ „ევროპული საქართველოს“ ფოთის, ხობისა და სენაკის მაჟორიტარი დეპუტატობის კანდიდატმა, გიგა ბოკერიამ დავით გარეჯის საზღვრის საკითხზე კომენტირებისას განაცხადა.
„ეს არის კიდევ ერთი კატასტროფული, ყველაზე სამარცხვინო შემთხვევა – ორი უდანაშაულო ადამიანის დაპატიმრება. ვიცნობ მათ, რომლებიც ამ ქვეყანას ემსახურებოდნენ მთელი ამ წლების განმავლობაში. ამ ხალხის ციხეში ჩაგდება სრულიად უკანონოდ, მხოლოდ იმისთვისაა, რომ აგორდეს ბინძური კამპანია, ისევ შავ-თეთრი სურათისთვის და რაც მთავარია, ეს ყველაფერი ხდება გარკვეული ჯგუფების, ბიზნესმენების, სამწუხაროდ, ზოგიერთი სასულიერო პირის გამოყენებით, ძალიან სახიფათო გზავნილით ჩვენს რეგიონში. ივანიშვილის რეჟიმი არ ერიდება არავის, ფაქტებს მათთვის მნიშვნელობა არ აქვს.
საქართველოსა და აზერბაიჯანს შორის შეთანხმება არ არის მიღწეული, რადგან სამწუხაროდ, შეუთავსებელი პოზიციებია და საქართველოს ინტერესია, ჩვენი პოზიცია დავიცვათ. ჯერ არაა მოხერხებული, ეს არ აინტერესებთ. ამ თემის საარჩევნო კამპანიისთვის გამოყენება ხდება და ამას ეწირება ორი უდანაშაულო ადამიანი. ეს არის მაგალითი, რატომ უნდა შეიცვალოს ხელისუფლება. საქართველო არასოდეს არ დათანხმებია სადავო ნაწილს. აი, იმ კომპლექსის იმ ნაწილში საზღვრის დელიმიტაციაზე დღესაც არ არის შეთანხმება.
ნოღაიდელს არანაირად არ ვაფასებ. ის შეფასებული, განაწილებული და დახარისხებულია. არანაირი ზედმეტის თქმა აღარ არის საჭირო ნოღაიდელზე“, – განაცხადა გიგა ბოკერიამ.