პარტია “გირჩის” თავმჯდომარე მორიგ ჯერზე აცხადებს, რომ ნამდვილი ბოიკოტი არის ის, რომ პარტიამ არც საბიუჯეტო დაფინანსება აიღოს და არც მომავალ თვითმმართველობის არჩევნებში მიიღოს მონაწილეობა. იაგო ხვიჩიას თქმით, ის ოპოზიციაში არათანმიმდევრულობას ხედავს და აცხადებს, რომ ერთიანობის შენარჩუნებისთვის აუცილებელია ცხადი გეგმა ჰქონდეთ:
“ჩვენ ნამდვილი ბოიკოტი გვინდა და არ გვინდა ეს პლასტმასის ბოიკოტი. ჩემზე მკაცრი ბოიკოტის მომხრე მე იქ არ მინახავს, ოღონდ თუ მართლა ბოიკოტს ვაპირებთ. მე სულ მაგას ვიძახი: ბოიკოტზე მოგყვებით, რევოლუცია გინდათ? – მოგყვებით, ეს გინდათ? – მოგყვებით. ოღონდ მითხარით, რა გინდათ, ოღონდ გეგმა დამანახეთ, ყველაფერზე თანახმა ვარ, თუ გეგმას ვნახულობ. მაგრამ თუ გეგმას არ ვნახულობ და არათანმიმდევრულობას ვხედავ, მაშინ ვაკრიტიკებ,” – განაცხადა იაგო ხვიჩიამ “დღის კურიერში”.