“რადიკალური ოპოზიცია და მისი ტელევიზიები ყველაფერს აკეთებდა, რომ მისი რეპუტაციისთვის ზიანის მიყენების მცდელობა გამოეკვეთა”

თავიდანვე ვამბობდით, რომ უამრავი ძალიან მძიმე სპეკულაცია იყო, იგივე რადიკალური ოპოზიციისა და მათ საკუთრებაში არსებული ტელევიზიების მხრიდან. საბოლოო ჯამში, ყველაფერს ნათელი მოეფინა, – ამის შესახებ „დღის კურიერის” ეთერში საპარლამენტო უმრავლესობის ლიდერმა ირაკლი კობახიძემ თამარ ბაჩალიაშვილის გარდაცვალების საქმის დახურვასთან დაკავშირებით განაცხადა.

მისი თქმით, „რადიკალური ოპოზიციის საკუთრებაში მყოფი ტელევიზიები” არ მოერიდნენ გარდაცვლილის პატივისა და ღირსების შელახვას, რაც ძალიან მძიმე ფაქტია.

„ამ პროცესს თავიდანვე ყურადღებით ვაკვირდებოდით, რადგან მგრძნობიარე საკითხი გახდა. თავიდანვე ვამბობდით, რომ უამრავი ძალიან მძიმე სპეკულაცია იყო, იგივე რადიკალური ოპოზიციისა და მათ საკუთრებაში არსებული ტელევიზიების მხრიდან. საბოლოო ჯამში, ყველაფერს ნათელი მოეფინა. ძალიან მძიმე რა არის, იცით? ყველაფერს აკეთებდა რადიკალური ოპოზიცია და მისი ტელევიზიები, რომ გარკვეული კუთხით, მისი რეპუტაციისთვის ზიანის მიყენების მცდელობა გამოეკვეთა, რაც არის ძალიან მძიმე, როცა არ უფრთხილდები სხვის პატივს და ღირსებას, მათ არანაირი ღირებულება არ აქვთ და გამოიკვეთა, მათ შორის, ამ საქმეში. არანაირი წითელი ხაზი, არც ღირსება და არც პატივი მათთვის, საინტერესო არ არის”, – განაცხადა ირაკლი კობახიძემ.