„ნაციონალური მოძრაობის“ თავმჯდომარის ნიკა მელიას გამოშვება ეს არაა პოლიტიკოსების საქმე, მას რამდენიმე საათში შეუძლია ციხის დატოვება, – ამის შესახებ საპარლამენტო უმრავლესობის ერთ-ერთმა ლიდერმა, გიორგი ხელაშვილმა „შაბათის ქრონიკის“ ეთერში განაცხადა.
„იენს სტოლტენბერგმა ახსენა ოპოზიციური პარტიის ხელმძღვანელის ყოფნა ციხეში, მაგრამ ამას არ მოჰყოლია მისი მხრიდან რამე შეთავაზება, პირობის დადება, მოთხოვნა ან რაღაცისკენ მოწოდება. მან უბრალოდ აღნიშნა დასანანი ფაქტი, რომ ოპოზიციის ლიდერი ციხეშია“, – აღნიშნა ხელაშვილმა.
მისი თქმით, მელიას შეუძლია რამდენიმე საათში სახლში იყოს.
„ეს ფუნდამენტურად განსხვავდება იმ ვითარებისგან, როცა რომელიმე არადემოკრატიული ხელისუფლება, ოპოზიციის რომელიმე წარმომადგენელს გზავნის ციხეში და არ აძლევს მას გამოსვლის საშუალებას, სასამართლოს გვერდის ავლით“, -განაცხადა ხელაშვილმა.
საპარლამენტო უმრავლესობის წევრი აცხადებს, რომ ანალოგიური საუბრები დაიწყო უკვე პოლიტიკოს გოგი წულაიაზე.
„მას ოპოზიციის ნაწილი პოლიტპატიმრად აცხადებს. ეს უკვე სცილდება საღი აზრის ფარგლებს“, – აღნიშნა ხელაშვილმა.
„ნაციონალური მოძრაობის“ თავმჯდომარე, ნიკა მელია 23 თებერვალს დააკავეს, 25 თებერვალს კი თბილისის სააპელაციო სასამართლომ დაუშვებლად ცნო ნიკა მელიას ადვოკატების საჩივარი, რომლებიც საქალაქო სასამართლოს გადაწყვეტილების გაუქმებას ითხოვდნენ.