ამ ოპოზიციის სიმბოლო ცარიელი კარვებია, რომელიც საქართველოს დედაქალაქის ცენტრალურ ქუჩაზე ანტისანიტარიის ბუდედ იქცა და ერთ-ერთი სამარცხვინო გამოვლინებაა, – ამის შესახებ რეჟისორმა გოგა ხაინდრავამ მდიაჰოლდინგ „კვირას“ პრესკლუბში, პრესკონფერენციაზე განაცხადა.
მან ქვეყანაში არსებული დღევანდლი პოლიტიკური სიტუაცია შეაფასა.
„ვფიქრობ, ერთი სერიოზული ეტაპი დავასრულეთ ამ ქვეყანაში. ჩემთვის, როგორც ვიზუალური ხელოვნების წარმომადგენლისთვის, ძალიან დიდი მნიშვნელობა აქვს სიმბოლოებს. ერთ-ერთი ასეთი სიმბოლო პარლამენტის წინ ცარიელი კარვებია. ძალიან ნიშანდობლივია, ქართველმა საზოგადოებამ და თითოეულმა ჩვენგანმა დღევანდელი ვითარება რომ გაიზიაროს“, – განაცხადა ხაინდრავამ.
მისივე თქმით, პარლამენტი კაცობრიობამ თავის დროზე იმისთვის შექმნა, რომ იქ პოლიტიკური დებატები და კამათი ცივილიზებული ფორმით გაიმართოს. ხაინდრავა მიიჩნევს, რომ დღევანდელ ოპოზიციას, რომელმაც 60 მანდატი მოიპოვა, ასეთი წარმატება წლების განმავლობაში არ ჰქონია,
„აღნიშნულის მიუხედავად, ამ ოპოზიციის სიმბოლო ცარიელი კარვებია, რომელიც საქართველოს დედაქალაქის ცენტრალურ ქუჩაზე ანტისანიტარიის ბუდედ იქცა და ერთ-ერთი სამარცხვინო გამოვლინებაა. ეს მეტყველებს იმაზე, რომ ეს ხალხი 30 წლის წინანდელ საქართველოშია, რომელიც საბჭოთა კავშირს დაშორებული ცივილიზებულ სამყაროში პირველ ნაბიჯებს დგამდა“, – განაცხადა ხაინდრავამ.
მისივე თქმით, 30 წლის განმავლობაში აღნიშნულ პოლიტიკურ წრეს რაღაც უნდა ესწავლა.
„სამწუხაროდ, ის პოლიტიკური წუმპე, რომელიც მაშინ ძალიან ნათელი იყო, დღემდე არ არის გამშრალი და იგივე ფიგურებს ვხედავთ – ნათელაშვილი, ბურჯანაძე. ადამიანები, რომლებიც საქართველოს პოლიტიკური გაჭირვების ყველა ეტაპზე კონკრეტულ როლს თამაშობდნენ. როგორც წესი, ეს როლი იყო ჩრდილოეთის ქარებისთვის დამახასიათებელი“, – დასძინა ხაინდრავამ.