ოკუპირებულ გალში დღეს დაკრძალეს, 7 აპრილს მდინარე ენგურში დაღუპული ახალგაზრდა ქალი თამარ ცატავა.
თამარი იმ ოთხი დაღუპულთაგან ერთ-ერთი იყო, რომელმაც ავადმყოფი შვილის გამო ე.წ. გადასასვლელით სასიკვდილო გზა გამოიარა.
როგორც ოკუპირებული გალიდან “პრაიმტაიმს” დაღუპული ქალის ნათესავი ატყობინებს, თამარი სწორედ ავადმყოფი შვილისთვის საჭირო საბუთების მოსაგვარებლად გადმოდიოდა.
„ასეთი ენით აღუწერელი ტრაგედია დაგვემართა. 7 წლის ანრი გვალიას ხერხემალზე აქვს თიაქარი, გაუკავდა ცალი ფეხი. ბავშვი სასწრაფოდ არის გადასაყვანი თურქეთში. ელემენტარული დევნილის მოწმობის საბუთი ვერ აიღეს აქ. იცით ზუგდიდზე ვართ დამოკიდებული ყველაფრით. ხიდით, რომ წამოსულიყო ხუთდღიანი კარანტინი საქართველოს კონტროლირებად ტერიტორიაზე უნდა გაევლო, აქეთ ბავშვის ავადმყოფობის გამო დროში იწვებოდა… ახლა კი სამუდამოდ გამოეთხოვა მის ოჯახს და შვილებს, პატარა სამი წლისაა… რა ქნას მცირეწლოვანი შვილების მამამ ზაზა გვალიამ, როგორ გაუძლოს ამ ტრაგედიას ან ავადმყოფ შვილს როგორ უმკურნალოს? ბედის ანაბარა მიტოვებულ აფხაზეთში“, – გვეუბნება ოჯახის ახლობელი.
შეგახსენებთ, 7 აპრილს ენგურის ტრაგედიას 4 ადამიანის სიცოცხლე შეეწირა. დაღუპულ ცოლ-ქმარს ჯონი გვალიას და მაყვალა გამისონიასოკუპირებულ სოფელ წარჩეშისამშაბათს დაკრძალავენ, ხოლო მეოთხე დაღუპული 60 წლის თამაზ ბასლანძე, ოკუპირებულ ჭუბურხინჯში დღეს დაკრძალეს.
10 აპრილი საქართველოში დაღუპულთა ხსოვნის პატივსაცემად გლოვის დღედ იყო გამოცხადებული.