ბოლო 24 საათში სპეციალურად შექმნილ პორტალზე – workabroad.moh.gov.ge ისრაელში დასაქმების მსურველი საქართველოს 760 მოქალაქე დარეგისტრირდა.
ინფორმაცია საქართველოს პირველ არხს დასაქმების ხელშეწყობის სააგენტოდან მიაწოდეს.
საქართველოს მოქალაქეების ისრაელში დროებით ლეგალურ დასაქმებაზე რეგისტრაცია გუშინ დაიწყო. საქართველოს მოქალაქეების ისრაელში ლეგალურად დასაქმებას ისრაელის სახელმწიფოსა და საქართველოს მთავრობას შორის დადებული შეთანხმება ითვალისწინებს.
სააგენტოს ცნობით, ისრაელის შრომის ბაზარზე საქართველოს მოქალაქეებს დროებითი ლეგალური დასაქმება ერთი წლით შეეძლებათ. დასაქმება ხანგრძლივი მოვლის დაწესებულებებში დამხმარე მუშაკის პოზიციაზეა შესაძლებელი.
საუბარია საქართველოს 1 000-მდე მოქალაქეზე, რომელიც შეძლებს ისრაელში ჩასვლას და მუშაობას. სამუშაოს ხანგრძლივობა არის სრული განაკვეთი, ექვსი სამუშაო დღე კვირაში, 42 საათი კვირაში. თვის დარიცხული ხელფასი კვირაში 42-საათიანი სამუშაო გრაფიკით 5 300 შეკელია.
ისრაელში ჩასული დასაქმებულები მიიღებენ ვიზას, რომელიც ძალაში ერთი წლის განმავლობაში იქნება და რომლის მოქმედების ვადის გაგრძელება შესაძლებელია მაქსიმუმ 63 თვემდე.