მიხეილ სააკაშვილმა ახალი ქონება ამჯერად რიბალ სკოეს საკურორტო ზონაში, მდინარე ხაროლის ნაპირზე შეიძინა. ირკვევა, რომ ყოფილმა პრეზიდენტმა ამ დასახლებაში პირველად მიწის ნაკვეთი 2019 წელს იყიდა. იანვარში კი მამული გააფართოვა.
უკრაინის უძრავი ქონების სააგენტოში ინფორმაცია ოდესაში სააკაშვილის პენტჰაუსის შესახებაც იძებნება. ადგილობრივი მედია წერს, რომ სააკაშვილმა აქაც დედა, გიული ალასანია ჩაწერა. ექსპრეზიდენტი უკრაინაში ასევე ფლობს მე-19 საუკუნის ისტორიულ შენობაში აპარტამენტებსა და მაიამიში, ერთ-ერთ ყველაზე პრესტიჟულ საცხოვრებელ კორპუსში საცხოვრებელს.
„მშენებლობა თითქმის დასრულებულია. ხოლოდ შიდა სამუშაოები, რემონტია დარჩენილი. ეს არის ელიტური რეგიონი კიევთან ახლოს, საკმაოდ პრესტიჟული და უკვე მჭიდრო დასახლება. ფაქტია, რომ სახლში ცხოვრობენ, რადგან მას დაცვაც ჰყავს. არ ვიცი, საქართველოსთან დაკავშირებით, სააკაშვილს რა მიზნები აქვს, მაგრამ უკრაინიდან წასვლას რომ არ აპირებს, ფაქტია. ფაქტია ისიც, რომ მისი ქონება მილიონს აჭარბებს. მას განზრახული აქვს უკრაინაში დიდი ხნით დარჩენა, მინიმუმ – ხშირად ყოფნა მაინც“ – ამბობს „სტრანა უა“-ს ჟურნალისტი ვლადისლავ ბოვტრუკი.
პოლიტოლოგი რუსლან ბორტნიკი კი ამბობს, რომ საჯარო მოხელის ხელფასით ამ ქონების შეძენა შეუძლებელია.
„მას ეს ფული ან საქართველოდან აქვს ჩამოტანილი, ან მაშინ დააგროვა, როცა ოდესის გუბერნატორი იყო. შესაძლოა, ახლა რეფორმების საბჭოდანაც იღებდეს. ეს თანამდებობები იმითაა განსაკუთრებული, რომ დიდ ფინანსებთან აქვს შეხება“ – აცხადებს პოლიტოლოგი.