ახლა „ნაცები“ პარლამენტში გინდ შეიტანეთ, გინდ გამოიტანეთ, – ამის შესახებ ირაკლი ზარქუამ „იმედის ფაქტორში“ განაცხადა. უმრავლესობის წევრის თქმით, „ნაციონალურ მოძრაობას პარლამენტში ქვეყნის აქტუალურ პრობლემებზე მსჯელობა არ აინტერესებს.
„ხელსაც არ აწერენ მიშელის დოკუმენტს, რომელმაც ორივე მხარეს მოგვისმინა და თქვა, რომ გამოსავალი არის ერთ რამეში – 19-21 ივნისი უნდა გადაიფურცლოს. პირდაპირ გეტყვით, ჩვენ დიდი სიამოვნებით არ მოგვიწერია ხელი, იმიტომ რომ იქ არის ისეთი თემები, რაც ჩვენ უნდა დავთმოთ, მაგრამ ჩვენ გამოვედით ისევ სახელმწიფო ინტერესებიდან, იმიტომ რომ ეს კინკლაობა უნდა დამთავრებულიყო, ეს უაზრო „შემოვალ, არ გამოვალ“. ახლა ხელს არ აწერენ. იცით რატომ? იმიტომ რომ ფუნქცია დაკარგეს. თავისი ამომრჩევლების თვალშიც ფუნქცია დაკარგეს, პარლამენტში მათი შემოსვლის აზრიც დაიკარგა“, – განაცხადა ზარქუამ.
მისივე თქმით, „ნაცმოძრაობის“ თავმჯდომარის, ნიკა მელიას დაპატიმრება, ისევე როგორც გათავისუფლება, მისივე ინიციატივა იყო.
„გაკოტრებული გამოვიდა ახლა ციხიდან. მე მის ადგილას პირდაპირ გამოვიდოდი და ვიტყოდი – სააკაშვილი. იმიტომ რომ რაც სააკაშვილმა მას დამართა, იმდენი უარი ათქმევინა, პრინციპზე უარი ათქმევინა, ნულზე დასვა ადამიანი და ისეთი გამოუშვა და ბოლოს უთხრა, ხელი უნდა მოაწერო, ისე უნდა შეხვიდეო. მოუწევთ მათ ხელის მოწერა ადრე თუ გვიან, მოუწევთ“, – განაცხადა ზარქუამ.