იტალიაში ქალაქ იზერნიაში პოლიციამ დააკავა საქართველოს მოქალაქე, რომელიც ძვირადღირებული მაღაზიიდან სუნამოს 15 ფლაკონის მოპარვას ცდილობდა. ამის შესახებ ადგილობრივი მედია წერს.
მაღაზიის პერსონალმა სამართალდამცველები მას შემდეგ გამოიძახეს, რაც დახლებზე ძვირადღირებული პროდუქციის არარსებობა შენიშნეს, საქართველოს 30 წლის მოქალაქე კი ამ დროს სალაროს გვერდის ავლით მაღაზიიდან გასვლას ცდილობდა.
პოლიციამ დაკავებულის ჩანთიდან 1700 ევროს ჯამური ღირებულების სუნამოს 15 ფლაკონი ამოიღო. როგორც აღმოჩნდა, საქართველოს მოქალაქე უკვე ფიგურირებდა პოლიციის ჩანაწერებში და მას იტალიის ტერიტორია რამდენიმე თვის წინ უნდა დაეტოვებინა.
სასამართლომ დაკავებულს 11-თვიანი პატიმრობა მიუსაჯა და 400 ევროს ოდენობის ჯარიმის გადახდა დააკისრა. ამჟამად მიმდინარეობს მუშაობა ამავე რეგიონში ქურდობის სხვა ფაქტებზე დაკავებული ქართველის შესაძლო კავშირის დასადგენად.