“ნაციონალურმა მოძრაობამ“ 19 აპრილის ხელშეკრულებაზე ხელმოწერის პროცესიც კი არ დაიწყო და ამით „ქართულ ოცნებას“ ხელმოწერის გაუქმება გაუადვილა”, – ამის შესახებ ევროპარლამენტარი ვიოლა ფონ კრამონი “ტვიტერზე” წერს.
„მართალია. სამწუხაროდ, ასევე მართალია უდიდესი ოპოზიციური პარტიის – „ერთიანი ნაციონალური მოძრაობის“ მიმართაც, რომელსაც 19 აპრილის შეთანხმების ხელმოწერაც კი არ დაუწყია. მათ გაუადვილეს „ქართულ ოცნებას“ ხელმოწერის გაუქმება. კიდევ უფრო მართალია: ამ გადაწყვეტილებებით ყველაზე მეტად საქართველოს მოსახლეობა დაზარალდება“, – წერს ვიოლა ფონ კრამონი.
აშშ-ის სენატის საგარეო ურთიერთობათა კომიტეტის წევრი ჯიმ რიში აცხადებს, რომ „ქართული ოცნების“ გადაწყვეტილება, გავიდეს 19 აპრილის შეთანხმებიდან, მთავრობის პასუხისმგებლობის მოხსნაა და როგორც ჩანს, მიანიშნებს, რომ პარტიას მხოლოდ საკუთარი მომავალი აღელვებს და არა მთელი ქვეყნის.
ცნობისათვის, „ქართული ოცნება“ 19 აპრილის შეთანხმებას ანულირებულად აცხადებს. შესაბამისი განცხადება პარტიის ლიდერებთან ერთად, “ქართული ოცნების” თავმჯდომარემ ირაკლი კობახიძემ საგანგებო ბრიფინგზე გააკეთა. კობახიძის თქმით, 19 აპრილის შეთანხმებამ საკუთარი თავი ამოწურა.
