საბერძნეთში ევროპის სხვადასხვა ქვეყნიდან და ახლო აღმოსავლეთიდან ჩასული ასობით მეხანძრე, ბერძენ კოლეგებთან ერთად, ტყის ხანძრის შეჩერებას ცდილობს, რომელიც ერთ კვირაზე მეტია ანადგურებს საბერძნეთის ტყეებს, სახლებს, ათასობით ადამიანი კი აიძულა, საკუთარი საცხოვრებელი ადგილი დაეტოვებინა.
ოფიციალური პირების ცნობით, ხანძრების გავრცელება დიდწილად შეჩერებულია, მაგრამ ხანძრის კერების კვლავ რჩება კუნძულ ევიაზე და საბერძნეთის სამხრეთ პელოპონესის რეგიონში, სადაც რამდენიმე სახლი დაიწვა.
საბერძნეთის სახანძრო სამსახურის ინფორმაციით, 900 მეხანძრე, მათ შორის ჯგუფები პოლონეთიდან, რუმინეთიდან, კვიპროსიდან, უკრაინიდან, სერბეთიდან, სლოვაკეთიდან და მოლდოვადან, 27 თვითმფრინავთან ერთად კუნძულ ევიაზე ხანძრის ჩასაქრობად მუშაობს.
განსაკუთებით დაზარალდა კუნძულის ჩრდილოეთ ნაწილი, სადაც დაიწვა 50 000 ჰექტარი ტერიტორია და ათობით სახლი.
600 მეხანძრეა განლაგებული პელოპონესში, სადაც მათ 33 სახანძრო თვითმფრინავი ეხმარება, მათ შორისაა ორი რუსული ილიუშინ ილ-76ს ტიპის თვითმფრინავი, რომელსაც ერთდროულად 40 ტონაზე მეტი წყლის ჩამოსხმა შეუძლია. პელოპენოსიდან ხელისუფლებამ 20-მდე სოფლის ევაკუაცია განახორციელა.
პრემიერ-მინისტრმა კირიაკოს მიცოტაკისმა ქვეყანაში არსებულ მდგომარეობას “კოშმარული ზაფხული” უწოდა.