საუდის არაბეთმა და რუსეთმა სამხედრო თანამშრომლობაზე დოკუმენტს ხელი მოსკოვში, შეიარაღების გამოფენაზე მოაწერეს.
საუდის არაბეთის თავდაცვის მინისტრის მოადგილე ხალიდ ბინ სალმანმა ტვიტერზე დაწერა, რომ რუსეთის თავდაცვის მინისტრის მოადგილე ალექსანდრ ფომინთან ხელი მოეწერა შეთანხმებას “ერთობლივი სამხედრო თანამშრომლობის განვითარებაზე ორ ქვეყანას შორის.”
სალმანი რუსეთის თავდაცვის მინისტრ სერგეი შოიგუსაც შეხვდა.
შეთანხმების შესახებ დამატებითი დეტალები ცნობილი არ არის. საუდის არაბეთი მსოფლიოში ყველაზე დიდი იარაღის იმპორტიორია, რუსეთი კი მეორე ყველაზე დიდი ექსპორტიორი.
საუდის არაბეთისთვის შეიარაღების ტადიციული მიმწოდებელი ამერიკაა. სტოქჰოლმის საერთაშორისო მშვიდობის კვლევის ინსტიტუტის ცნობით, საუდის არაბეთმა 2016-20 წლებში ამერიკის მიერ ექსპორტირებული იარაღის 24% შეიძინა.
საუდის არაბეთის თავდაცვის მინისტრის მოადგილის განცხადებით, რუსულმა შეიარაღებამ ეფექტურობა სირიაში დაამტკიცა.