კორონავირუსის დელტა შტამით ინფიცირებულებს შორის ჰოსპიტალიზაციის რისკი ორჯერ უფრო დიდია, ვიდრე ალფა შტამით დაავადების შემთხვევაში. ამის შესახებ BBC ბრიტანული მეცნიერების კვლევაზე დაყრდნობით წერს.
გამოცემის ინფორმაციით, კვლევა ჟურნალ „ლანცეტში“ გამოქვეყნდა. მასზე ინგლისის საჯარო ჯანმრთელობისა და სამედიცინო კვლევის საბჭოს თანამშრომლები მუშაობდნენ. მათ ინგლისში მარტიდან მაისის ჩათვლის ინფიცირების 43 338 შემთხვევა შეისწავლეს, რომელთა უმეტესობაც ვაქცინირებული არ იყო. ამ პერიოდში ქვეყანაში როგორც ალფა (ბრიტანული), ასევე დელტა (ინდური) შტამები იყო გავრცელებული. სპეციალისტებმა დაასკვნეს, რომ დელტათი ინფიცირებული პაციენტები კლინიკებში ალფათი ინფიცირებულებზე ორჯერ ხშირად ხვდებოდნენ.
მეცნიერები აღნიშნავენ, რომ ვაქცინაცია ჰოსპიტალიზაციის რისკს მნიშვნელოვნად ამცირებს, მაქსიმალური დაცვისთვის კი ვაქცინის ორი დოზაა საჭირო.