ჩემთვის ძალიან დიდი პასუხისმგებლობაა, ვიყო დღეს თქვენთან ერთად, რადგან ჩვენი ქვეყნისთვის მნიშვნელოვანია, რომ ახლებურად შევხედოთ მომავალს, გადავიდეთ განვითარების ახალ ეტაპზე და არავის მივცეთ საშუალება, დაგვაბრუნოს წარსულში, – ამის შესახებ, „ქართული ოცნების“ წინასაარჩევნო კამპანიის შემაჯამებელ შეკრებაზე სიტყვით გამოსვლისას, „ქართული ოცნების“ რუსთავის მერობის კანდიდატმა, ნინო ლაცაბიძემ განაცხადა.
„მჯერა, რომ ჩვენი დღევანდელი ერთად დგომა არის ძალიან ძვირფასი. ჩვენ გვჭირდება სულისკვეთება, რათა ადამიანებს დავანახოთ, რომ ჩვენ მიერ არჩეული გზა არის თავისუფლებისა და წარმატების გზა. ჩვენ მოვიპოვეთ თავისუფლება და ვინმესთვის დათმობას არ ვაპირებთ, რადგან ბევრი ძალიან მნიშვნელოვანი საქმე გვაქვს დაწყებული, რომელიც ბოლომდე უნდა მივიყვანოთ. ეს ჩვენს ქვეყანას კიდევ უფრო მეტ შესაძლებლობას მისცემს. არ შემიძლია, განსაკუთრებით არ მოვეფერო ჩემს რუსთაველებს. ნებისმიერი განსხვავებული აზრის მიუხედავად, მე დარწმუნებული ვარ, რომ ჩვენს ქალაქში ჩვენი შვილების უკეთესი ხვალინდელი დღის სურვილი ყველას გაგვაერთიანებს. მადლობა მხარდაჭერისა და ნდობისთვის, რომელიც ჩემთვის ძალიან ძვირფასია. სწორედ ასე, სოფლებისა და ქალაქების განვითარებით, ყველანი ერთად გავაძლიერებთ საქართველოს. ესაა ჩვენი გუნდის მთავარი მიზანი და ჩემი მთავარი ამოცანა, რომ არა როგორც პოლიტიკოსმა, არამედ როგორც დედამ, ვიბრძოლო ჩვენი ლამაზი შვილების ლამაზი და ძლიერი ქვეყნისთვის“, – განაცხადა ნინო ლაცაბიძემ.