საფრანგეთის პრეზიდენტმა, ემანუელ მაკრონმა და ავსტრალიის პრემიერ-მინისტრმა, სკოტ მორისონმა სატელეფონო საუბარი გამართეს. ინფორმაციას ამის შესახებ საფრანგეთის პრეზიდენტის ადმინისტრაცია ავრცელებს.
„პრეზიდენტმა აღნიშნა, რომ ავსტრალიის ცალმხრივმა გადაწყვეტილებამ, შეემცირებინა საფრანგეთისა და ავსტრალიის სტრატეგიული პარტნიორობა წყალქვეშა ნავების პროგრამის შეწყვეტით სხვა პროექტის სასარგებლოდ, ორ ქვეყანას შორის ნდობით აღსავსე ურთიერთობა დაარღვია“, – ნათქვამია განცხადებაში.
ავსტრალიის პრემიერ-მინისტრთან სატელეფონო საუბრისას საფრანგეთის პრეზიდენტმა ხაზგასმით აღნიშნა, რომ ორმხრივი ურთიერთობების საფუძვლის ხელახალი განსაზღვრისთვის ავსტრალიის მთავრობა კონკრეტული წინადადებებით უნდა გამოვიდეს.
15 სექტემბერს აშშ-მა, დიდმა ბრიტანეთმა და ავსტრალიამ უსაფრთხოების სფეროში ისტორიული ალიანსის შექმნა გამოაცხადეს. როგორც სამი ქვეყნის ლიდერებმა განაცხადეს, ახალი ალიანსი ინდოეთისა და წყნარი ოკეანის რეგიონზე იქნება ფოკუსირებული. პარტნიორობის ფარგლებში, აშშ ავსტრალიას ბირთვული წყალქვეშა ნავების განლაგებისთვის საჭირო ტექნოლოგიასა და შესაძლებლობებს გადასცემს.
საფრანგეთმა აშშ-ის პრეზიდენტი, ჯო ბაიდენი ზურგში დანის ჩარტყმასა და დონალდ ტრამპის მსგავსად ქცევაში დაადანაშაულა მას შემდეგ, რაც საფრანგეთი აშშ-ის, დიდი ბრიტანეთისა და ავსტრალიის მიერ გამოცხადებული ალიანსის მიღმა აღმოჩნდა.
2016 წელს, ავსტრალიამ ფრანგული გემთმშენებელი კომპანია Naval Group-ი შეარჩია, რომელსაც ავსტრალიის ახალი წყალქვეშა ფლოტი უნდა აეშენებინა. კონტრაქტის ღირებულება 40 მილიარდ დოლარს შეადგენდა.