“პრემიერს ვეთანხმები, რომ ადამიანის სხეულს მისგან ვერავინ ვერ დაიცავს… ქვეყნის მართლმსაჯულების სისტემას არ ესმის, რომ ადამიანს ეკუთვნის თავისი სხეული”, – ამის შესახებ პარტია „გირჩის“ წევრმა, იაგო ხვიჩიამ ირაკლი ღარიბაშვილის გუშინდელი განცხადების კომენტირებისას განაცხადა.
პრემიერის თქმით, „კანონით, ადამიანს თვითმკვლელობის უფლება აქვს“.
ხვიჩიას განმარტებით, იგივე პრინციპი მოქმედებს, როცა ადამიანებს წლობით სვამენ ციხეში ნარკოტიკის მოხმარების გამო.
„გაგიკვირდებათ და ირაკლი ღარიბაშვილი მართალია, მაგრამ იგივე პრინციპი მოქმედებს მაშინ, როცა ადამიანები წლობით ციხეში ნარკოტიკების მოხმარების გამო სხედან. პრემიერს ვეთანხმები, რომ ადამიანის სხეულს მისგან ვერავინ ვერ დაიცავს, მაგრამ იგივე პრინციპი მოქმედებს იმ შემთხვევებშიც, როცა ნარკოტიკების მოხმარების გამო ათასობით ადამიანი ციხეში ზის. ქვეყნის მართლმსაჯულების სისტემას არ ესმის, რომ ადამიანს ეკუთვნის მისი სხეული, რაც პრემიერმინისტრმა თქვა.
როგორ შეიძლება, ადამიანს თვითმკვლელობის უფლება არ ჰქონდეს? კაცი თუ თავს იკლავს, როგორ შეიძლება, რაიმე უფრო მძიმე მოიფიქრო, რითაც მას შეაშინებ და ამას აუკრძალავ.
აქ კონტექსტი არ არის პრობლემა. პრობლემაა აროგანტულობა, როგორც ამ პოლიტიკურ პროცესს პრემიერმინისტრი უყურებს. სიტყვათა ერთობლიობა, რომ ადამიანს თვითმკვლელობის უფლება აქვს, შეიძლება, ვიღაცას სისულელედ ეჩვენება, მაგრამ სიტყვათა ეს ერთობლიობა სისულელე ნამდვილად არ არის“, – განაცხადა იაგო ხვიჩიამ.