ისრაელმა ვაქცინირებულ ან კორონავირუსისგან გამოჯანმრთელებულ უცხოელ ტურისტებს საზღვრები გაუხსნა. ინფორმაციას ამის შესახებ ადგილობრივი გამოცემა The Times of Israel-ი ავრცელებს.
ისრაელში ტურისტები მხოლოდ იმ ქვეყნებიდან დაიშვებიან, რომლებიც ინფექციის მაღალი მაჩვენებლების გამო ე.წ. წითელ სიაში არ არიან შეყვანილი. ახალი რეგულაციების თანახმად, ისრაელში შესვლა მხოლოდ იმ ტურისტებს შეეძლებათ, რომლებიც თვითმფრინავში ჩასხდომამდე 180 დღის განმავლობაში იყვნენ აცრილნი.
ისრაელის მთავრობის გადაწყვეტილებით, ქვეყანაში ის ტურისტები დაიშვებიან, რომლებიც შემდეგი ვაქცინებით არიან აცრილნი: Pfizer/BioNTech-ი, Moderna, Astrazeneca, Johnson & Johnson-ი, Sinovac-ი და Sinopharm-ი. გარდა ამისა, მიმდინარე თვის მეორე ნახევრიდან ისრაელი რუსული Sputnik V-ით აცრილ ვიზიტორებსაც დაუშვებს.
Pfizer-ის ვაქცინის შემთხვევაში, ისრაელში შესვლამდე მეორე (ან გამაძლიერებელი) დოზიდან 7 დღე უნდა გავიდეს, ხოლო Moderna-ს, Astrazeneca-ს, Johnson & Johnson-ის, Sinovac-ისა და Sinopharm-ის შემთხვევაში – 14 დღე.
„გლობალური პანდემიის პერიოდში ისრაელის მონახულების ინტერესი მაღალი რჩებოდა და ისრაელის ტურიზმის სამინისტრო ბევრს მუშაობდა კრეატიული გადაწყვეტილებების მოსაძებნად, რათა ხელი შეეწყო ტურისტების უსაფრთხო დაბრუნებისთვის“, – ნათქვამია ისრაელის ტურიზმის სამინისტროს განცხადებაში.