პარლამენტის დეპუტატების მიერ მანდატების დატოვების ფაქტს სოციალურ ქსელში ეხმაურება პარტია „მოქალაქეების“ დეპუტატი, პარლამენტის ვიცე-სპიკერი ლევან იოსელიანი.
იოსელიანი დეპუტატების გადაწყვეტილებას აბსურდულსა და ალოგიკურს უწოდებს.
„აბსურდულის და წინააღმდეგობრივის კომბინაცია ანუ სიურეალიზმი ქართულ პოლიტიკაში.
არჩევნები “გაუქმდა“ და „გაყალბდა“ გამოაცხადა ნაციონალურმა მოძრაობამ და საქართველოს მასშტაბით, საკრებულოებში და მერიაში კუთვნილი ადგილების დასაკავებლად ემზადება.
ამის საპირისპიროდ კი, პარლამენტში დეპუტატებს მოუწოდებს დატოვონ პარლამენტი (რომლის არჩევნებიც არ ყოფილა), რადგან არჩევნები “ გაუქმდა“ და “ გაყალბდა“, ოღონდ ამ „გაყალბებას “ და „გაუქმებას“ თვითმმართველობის დონეზე არ აღიარებენ და ადგილების დაკავებით არჩევნებს სრულ ლეგიტიმაციას სძენენ.
ანა წითლიძის და ნონა მამულაშვილის ჯინი თუ გჭირთ არ ვიცი, მაგრამ, გასაკვირია რა ნამუსით სთხოვთ თქვენს დეპუტატებს პარლამენტიდან გამოსვლას, როცა საკრებულოებში თავქუდმოგლეჯილები შერბიხართ, იმ არჩევნების საფუძველზე რომელიც, „გაუქმდა“ და „გაყალბდა,“ – წერს ლევან იოსელიანი.
ცნობისათვის, საპარლამენტო მანდატის დატოვების შესახებ პირველმა დეპუტატმა მამუკა ხაზარაძემ განაცხადა. მოგვიანებით, ხაზარაძის გადაწყვეტილება გაიზიარეს და საპარლამენტო უფლებამოსილების შეწყვეტის შესახებ განაცხადეს დეპუტატებმა ზურაბ ჯაფარიძემ, ნონა მამულაშვილმა და ანა წითლიძემ.