ჩემთვის „ლელო“ „ნაცმოძრაობის“ ჩვეულებრივი დანამატი გახდა, ეს მათი არჩევანია, – ამის შესახებ საპარლამენტო უმრავლესობის წევრმა ირაკლი ზარქუამ საქართველოს პირველ არხს განუცხადა.
მისივე თქმით, „ლელოს“ მიმართ სხვა მოლოდინები ჰქონდა.
„ჩემთვის „ლელო“ „ნაცმოძრაობის“ ჩვეულებრივი დანამატი გახდა, რაც სამწუხაროა. მათ მიმართ სულ სხვა მოლოდინები მქონდა. უფრო საინტერესო იყო, მათთან გვქონოდა დისკუსია, დებატები, რადგან ეს ხალხი ბიზნესიდან მოდის და ამის ნაცვლად აღმოჩნდა, რომ „ნაცმოძრაობის“ ერთი ჩვეულებრივი დანაყოფია. ეს მათი არჩევანია.
რაც შეეხება მიხეილ სააკაშვილს, მას ეწევა და გაეწევა შესაბამისი სამედიცინო მომსახურება. იმ შემთხვევაში, თუ ამის საჭიროება იქნება, შესაძლებელია, ციხის საავადმყოფოშიც გადაიყვანონ. მგონია, რომ დრამატიზებას თავად ახდენენ, რომ სააკაშვილით პოლიტიკური ქულები მოიპოვონ. მათ ვურჩევ, ამ კაცს თავი დაანებონ. ის ციხეში ზის, დაასვენონ, ნუ აჟიტირებენ, საქმეს მიხედონ. თუ მუშაობა უნდათ, აქ, პარლამენტში არის სამუშაო გარემო“, – განაცხადა ირაკლი ზარქუამ.