ჟურნალისტმა, ნანუკა ჟორჟოლიანმა რუსთავის მე-12 სასჯელაღსრულების დაწესებულებასთან მიხეილ სააკაშვილის მხარდასაჭერ აქციაზე სიტყვით გამოსვლისას განაცხადა, რომ მხარდამჭერებმა პროტესტის ფორმით დახატონ, დაწერონ და გზავნილი ბიძინა ივანიშვილს გაუგზავნონ.
“ნებისმიერ თქვენგანს შეგიძლიათ, პროტესტის ფორმით დაწერეთ, დახატეთ და შემდეგ გაუგზავნეთ გზავნილი ბიძინა ივანიშვილს, რას სთხოვთ მას და მერე ჩვენ, მიხეილ სააკაშვილის მხარდამჭერები, ბიძინას წავუღებთ სახლში და წინ სახლთან გავუკრავთ ამას,” – განაცხადა ნანუკა ჟორჟოლიანმა.
ამასთან, აქციაზე სიტყვით გამოსვლის შემდეგ მან “მთავარ არხთან” ინტერვიუში სახელმწიფო უსაფრთხოების სამსახურს მიმართა და განაცხადა, რომ თუ ექსპრეზიდენტს სამედიცინო დაწესებულებაში არ გადაიყვანენ, მაშინ რევოლუციას მოაწყობენ.
თუ მიხეილ სააკაშვილს დაუყონებლივ არ გადაიყვანენ საავადმყოფოში, სუს-ს ვეუბნები, რომ რევოლუცია მოდის, ამის პირობას ვაძლევ! თუ მიხეილ სააკაშვილის სიცოცხლეს საფრთხე დაემუქრება, რევოლუციას უბედურებაც მოჰყვება. ადამიანებს თითქოს ჰგონიათ, რომ ფანატიზმი გვალაპარაკებს. რა სახელი და გვარიც არ უნდა ჰქონოდა ქვეყნის პირველ პირს, ნებისმიერი პრეზიდენტის სიცოცხლეს რომ საფრთხე დამუქრებოდა, ზუსტად ისეთივე კრიტიკულები ვიქნებოდით, როგორც ახლა,” – განაცხადა ნანუკა ჟორჟოლიანმა.
ამ წუთებში მიხეილ სააკაშვილის მხარდამჭერები, პოლიტიკოსები, მოქალაქეები და სამოქალაქო აქტივისტები რუსთავის ციხესთან აქცია მართავენ.
ცნობისთვის, დღეს სახელმწიფო უსაფრთხოების სამსახურმა განცხადება გაავრცელა, რომლის მიხედვით, უწყება მოუწოდებს დესტრუქციულ ძალებს, თავი შეიკავონ დანაშაულებრივი ქმედებების ჩადენისგან.
შეგახსენებთ, საქართველოს მესამე პრეზიდენტი, მიხეილ სააკაშვილი პირველ ოქტომბერს დააკავეს. ის რუსთავის მე-12 პენიტენციურ დაწესებულებაში 34-ე დღეა რაც შიმშილობს.