ჩვენ დღეს გვემსახურება ძლიერი დიპლომატია, რაც ქვეყნისთვის უმნიშვნელოვანესია, – ამის შესახებ საქართველოს პრეზიდენტმა სალომე ზურაბიშვილმა ავლაბარში, სახელმწიფო ცერემონიების სასახლეში ქართული დიპლომატიის დღისადმი მიძღვნილ ღონისძიებაზე სიტყვის გამოსვლისას განაცხადა.
„დიპლომატია ყოველთვის იყო მნიშვნელოვანი, ამიტომ სულხან საბა ორბელიანი 300 წლის წინ ცდილობდა იმ გზის გაკაფვას, რომელზეც ახლა ვდგავართ უფრო აქტიურად, სულ სხვა მდგომარეობაში. ჩვენ ევროპის მიერ უკვე ასოცირებული ქვეყანა ვართ, რომელზეც ოცნებობდა სულხან-საბა ორბელიანი და მას შემდეგ კიდევ უფრო მეტი დიდი ქართველი“, – განაცხადა ზურაბიშვილმა.
პრეზიდენტის განცხადებით, დღეს ევროპასთან მიღწეული შედეგი, არის პირველი დიპლომატების დამსახურება, რომლებიც უფრო რთულ პირობებში იბრძოდნენ იმავე მიზნისთვის, რომ საქართველო ყოფილიყო აღიარებული საერთაშორისო თანამეგობრობის მიერ, როგორც ერთ-ერთი მათი ნაწილი და დამოუკიდებელი ქვეყანა. „ჩვენ დღესაც გვაქვს ეს გამოწვევა ოკუპირებული ტერიტორიებიდან გამომდინარე და სხვადასხვა გამოწვევებიდან. ჩვენ დღეს კიდევ უნდა ვამტკიცოთ, რომ ვართ დამოუკიდებელი ქვეყანა და გვაქვს უფლება ვიყოთ საერთაშორისო თანამეგობრობის სრულუფლებიანი წევრი. ამასთან ჩვენ მაგივრად არავინ უნდა წყვეტდეს რა არის ჩვენი გზა და რა არის ჩვენი ორიენტაცია“, – აღნიშნა ზურაბიშვილმა.