ვინმე თუ ღელავს, ვაითუ სააკაშვილი ხელისუფლებაში დაბრუნდეს, რა გვეშველებაო, დავამშვიდებ და ვეტყვი, ეს არ მოხდება, – ამის შესახებ საქართველოს პარლამენტის თვითმმართველობის კომიტეტის თავმჯდომარე სოზარ სუბარმა განაცხადა.
ამასთან, სოზარ სუბარმა აღნიშნა, რომ მიხეილ სააკაშვილი ხელისუფლებაში არასდროს დაბრუნდება.
„ვინმე თუ ღელავს, ვაითუ სააკაშვილი ხელისუფლებაში დაბრუნდეს და რა გვეშველებაო, დავამშვიდებ და ვეტყვი, ეს არ მოხდება. თუ ვინმე ოცნებობს, რომ სააკაშვილი ხელისუფლებაში დაბრუნდება, ამ განზრახვას ცივი წყალი უნდა გადავასხათ და ვუთხრათ, რომ ეს არ მოხდება არასდროს – არც იმ ექვს წელში, რომელიც ციხეში უნდა გაატაროს და არც მას შემდეგ, როცა შეიძლება, იყოს თავისუფალი ან არ იყოს იმის მიხედვით, როგორ დამთავრდება სასამართლო პროცესები, რომელიც მის წინააღმდეგ მიმდინარეობს.
რაც შეეხება ნიკა მელიას „ნაციონალურ მოძრაობასთან“ და სააკაშვილთან ურთიერთობას, რატომ არ დააწერა ნიკა მელიამ მის საარჩევნო ბანერზე „5“ ნომერი, რატომ გარბის „ლელოში“ და ატარებს ბრიფინგებს, ასევე რატომ არ ეხმარებიან „ნაციონალური მოძრაობის“ სხვა ლიდერები ძალის მობილიზებაში, როცა ის აანონსებს შეკრებას, ეს ჩვენი საქმე არ არის, თავად იმსჯელონ. სჯობს, უფრო მეტი ქვეყნის მომავალზე იფიქრონ, ვიდრე პარტიულ ინტერესებზე. „ნაციონალური მოძრაობა“ ოცნებობს სააკაშვილის დაბრუნებაზე და ეს ოცნება არ ახდება, თუ ვინმე არ ოცნებობს და ეშინია, ეს არ ახდება, შეუძლიათ, მშვიდად იყონ“, – განაცხადა სოზარ სუბარმა.