“გლდანის ციხე არის პირდაპირ სასიკვდილო განაჩენი მიხეილ სააკაშვილისთვის როგორც სამედიცინო, ასევე, მისი უსაფრთხოების თვალსაზრისით”, – ამის შესახებ “ნაციონალური მოძრაობის” წევრმა, ზაალ უდუმაშვილმა მიხეილ სააკაშვილის ჰოსპიტალიზაციასთან დაკავშირებით განაცხადა.
„ღმერთი არ გაუწყრეთ და ეს ვერტმფრენი არ დაჯდეს გლდანის ციხეში. გლდანის ციხე არის პირდაპირ სასიკვდილო განაჩენი მიხეილ სააკაშვილისთვის როგორც სამედიცინო, ასევე, მისი უსაფრთხოების თვალსაზრისით, რადგან ეს არის ჩვეულებრივი ამბულატორია, სადაც შეიძლება, უბრალოდ, ძალიან ელემენტარული პროცედურები გაიარონ პატიმრებმა, როდესაც მათ რაღაც დაუშავდებათ ციხეში. არანაირი მომსახურების დონე არ გააჩნია მას, რომ ასეთი პაციენტი მიიღოს. ამას ირწმუნება ყველა ექიმი მთელი ამ 39 დღის განმავლობაში, რამდენი ექიმის პოზიციაც მე მოვისმინე“, – განაცხადა ზაალ უდუმაშვილმა.
ცნობისთვის, ცოტა ხნის წინ, მსჯავრდებული ექსპრეზიდენტის დედამ, გიული ალასანიამ ჟურნალისტებს განუცხადა, რომ ციხეში შვილის სანახავად მისულს, მიხეილ სააკაშვილი “თვალწინ ააცალეს” და ჯერ ბრონირებულ მაქანაში ჩასვეს, შემდეგ კი ვერტმფრენში გადაიყვანეს.