ცნობილი კანადელი მომღერალი და კომპოზიტორი ლეონარდ კოენი 82 წლის ასაკში გარდაიცვალა. შესაბამისი ინფორმაცია „ფეისბუქ“-ის ოფიციალურ გვერდზე გამოქვეყნდა. მომღერლის გარდაცვალების მიზეზი არ სახელდება.
ლეონარდ კოენი 1934 წელს მონრეალში დაიბადა. სტუდენტობის დროს გამოაქვეყნა არაერთი რომანი და ლექსი. გასული საუკუნის 60-იან წლებში კოენის მუსიკალური კარიერა დაიწყო, მისი პირველი ალბომი 1967 წელს გამოვიდა.
80-იან წლებში კოენი ბუდიზმით დაინტერესდა და 1996 წელს ბუდისტი ბერი გახდა. 2001 წელს კი ახალი ალბომი „ათი ახალი სიმღერა“ გამოუშვა.
2008 წელს კოენმა 18-თვიანი მუსიკალური ტურნე მოაწყო, 2012 წელს კი გამოვიდა მისი ალბომი „ძველი იდეები“, რომელიც მუსიკალურ ჩარტებში ერთ-ერთი ყველაზე პოპულარული გახდა.
ბოლო, 14-ე ალბომი სახელწოდებით You Want It Darker ლეონარდ კოენმა გასულ თვეს გამოუშვა.
ლეონარდ კოენის ერთ-ერთი ყველაზე პოპულარული სიმღერებია In My Secret Life, Hallelujah, I’m Your Man და სხვ.