აშშ-ის პრეზიდენტობის კანდიდატმა ჰილარი კლინტონმა არჩევნებში თავის დამარცხებაში გამოძიების ფედერალური ბიუროს ხელმძღვანელი ჯეიმს კომი დაადანაშაულა. ამის შესახებ სააგენტო Reuters-ის ცნობით, კლინტონმა ფინანსურ დონორებთან ტელეკონფერენციის დროს განაცხადა. მისი თქმით, არჩევნებამდე 11 დღით ადრე კომის განცხადებამ მის წინააღმდეგ გამოძიების განახლების შესახებ პრესაში უარყოფითი რეზონანსი გამოიწვია, რამაც საბოლოო ჯამში, არ მისცა მას შესაძლებლობა, წარმატებით დაესრულებინა საპრეზიდენტო რბოლა.
სახელმწიფო მდივნის თანამდებობაზე ყოფნის დროს ჰილარი კლინტონის მიერ ელექტრონულ მიმოწერასთან დაკავშირებით სკანდალი 2015 წლის მარტში აგორდა. გამოძიების ცნობით, ჰილარი კლინტონი 2009-2013 წლებში სამსახურეობრივი მიმოწერის დროს არა დაცულ, არამედ კერძო საფოსტო სერვერს იყენებდა. მალევე კლინტონმა თავისი მიმოწერის გასაჯაროების პირობა დადო. სექტემბერში კი ბოდიში მოიხადა იმის გამო, რომ პირად საფოსტო სერვერს სამსახურეობივი მიმოწერისთვის იყენებდა.