საპარლამენტო უმრავლესობის წევრის, რატი იონათამიშვილის განცხადებით, სახელმწიფო ინსპექტორის სამსახურის გაუქმება და, მის ნაცვლად, სპეციალური საგამოძიებო სამსახურისა და პერსონალურ მონაცემთა დაცვის სამსახურის შექმნა საუკეთესო საერთაშორისო პრაქტიკას პასუხობს.
„საუკეთესო საერთაშორისო პრაქტიკაა, რომ, ერთდროულად, პერსონალური მონაცემების დაცვა და საგამოძიებო კომპონენტის განხორციელება ფუნქციების აღრევასა და ინტერესთა კონფლიქტს იწვევს. შესაბამისად, შეიქმნება ორი ახალი უწყება, ფუნქციები გადანაწილდება საერთაშორისო პრაქტიკის ჰარმონიზაციით. აქედან გამომდინარე, კიდევ უფრო მაღალი დამოუკიდებლობის ხარისხით გაკონტროლდება როგორც პერსონალური მონაცემების დაცვა, ისე – საგამოძიებო კომპონენტი“, – აღნიშნავს რატი იონათამიშვილი.
„სახელმწიფო ინსპექტორის თანამდებობა და სახელმწიფო ინსპექტორის სამსახური უქმდება. მის ნაცვლად, სპეციალური საგამოძიებო სამსახური და პერსონალურ მონაცემთა დაცვის სამსახური იქმნება. შესაბამისი საკანონმდებლო პაკეტი, რომელიც უმრავლესობის დეპუტატების მიერ მომზადდა, პარლამენტის ბიუროს უახლოეს სხდომაზე წარედგინება.